Search
"ლიბერალი" მისამართი: თბილისი, რუსთაველის 50 ტელეფონი: +995 32 2470246 ელ. ფოსტა: [email protected] Facebook: https://www.facebook.com/liberalimagazine
გაგზავნა
გაგზავნა

„დაინახე ყველა ფერი" - მითების და სტერეოტიპების გასაქრობად

24 თებერვალი 2017

მითები და სტერეოტიპები, რომელიც შეზღუდული შესაძლებლობის მქონე ადამიანების მიმართ არსებობს, უნდა შემცირდეს და საბოლოოდ, გაქრეს - საქართველოში ორწლიანი ანტისტიგმა კამპანია იწყება. „დაინახე ყველა ფერი” - ასე ჰქვია სოციალური ცვლილებებისთვის დაწყებულ მოძრაობას, რომელიც ამ პერიოდის განმავლობაში სხვადასხვა აქტივობას მოიცავს.

კამპანია გაერო-ის ბავშვთა ფონდის ინიციატივით და ევროკავშირისა და ამერიკის საერთაშორისო განვითარების სააგენტოს მხარდაჭერითა და შეზღუდული შესაძლებლობის მქონე ბავშვებისა და მათი მშობლების აქტიური მონაწილეობით იმართება.

პროექტი 23 თებერვალს ზურაბ წერეთლის თანამედროვე ხელოვნების მუზეუმში გაიხსნა. პრეზენტაციაზე შეზღუდული შესაძლებლობის მქონე ადამიანები ოთახის სხვადასხვა კუთხეში მოწყობილ მაგიდებთან სტუმრებს მასპინძლობდნენ და მათ სხვადასხვა აქტივობაში ჩართვას სთავაზობდნენ. მაგალითად, მითებისა და რეალობის ჭიდან სტუმრებს შეეძლოთ გაეგოთ, ხშირად რა არასწორი წარმოდგენები აქვთ ადამიანებს შშმ პირების შესახებ.

ერთ-ერთ კუთხეში შეზღუდული შესაძლებლობის მქონე ადამიანები სხვა მოხალისეებს ბუტერბროდების დახმარებაში ეხმარებოდნენ. ჟურნალისტი, გოგა აფციაური კამპანიის ერთ-ერთი მონაწილეა. პრეზენტაციაზე ის შვილთან, სალომესთან ერთად იყო მოსული:

„მაგალითად, ეს „მითების ჭა“ ჩვენი დღევანდელი აზროვნება და დამოკიდებულებაა შეზღუდული შესაძლებლობის მქონე ადამიანების მიმართ. ამ კამპანიის ფარგლებში ეს „მითები ჭიდან“ უნდა ამოვიღოთ და შევავსოთ სუფთა წყლით”.

მარი კორკოტაძემ, რომელიც შეზღუდული შესაძლებლობის მქონე ბავშვის მშობელი და კამპანიის ერთ-ერთი აქტიური წევრია, მშობლების მანიფესტი წაიკითხა:

"ბავშვები შეზღუდული შესაძლებლობის გამო კვლავ ხვდებიან ბავშვთა სახლებში! ბავშვებს, არსებული სტიგმის და მშობლებზე წნეხის გამო, ხშირად უწევთ მხოლოდ სახლში ყოფნა და გარეთ ვერ გამოდიან! ბავშვები ვერ იღებენ შესაბამის განათლებას! ბავშვებს ხელი არ მიუწვდებათ საჯარო სივრცეებსა და გასართობ ადგილებზე! ბავშვების მომავალი პროფესიული განვითარება ხშირად ბუნდოვანია! ბავშვები მოკლებულნი არიან ურთიერთობებსა და მეგობრებს! და ამიტომ, ჩვენ ყველა ვერთიანდებით ანტი-სტიგმა მოძრაობაში, რომ შევძლოთ და ერთად ვიბრძოლოთ ჩვენს ქვეყანაში სტიგმის დასამარცხებლად. ჩვენმა მოძრაობამ უნდა შექმნას ახალი ღირებულებათა სისტემა,რომელსაც საფუძვლად უდევს შეზღუდული შესაძლებლობის მქონე ბავშვების საჭიროებების ცოდნა,  თვითრეალიზაციის მხარდაჭერა და მათი უფლებების პატივისცემა".

მერაბ დუკაშვილიც კამპანიის ერთ-ერთი მონაწილეა. ამბობს, რომ ბოლო წლებში გარკვეული წინ გადადგმული ნაბიჯებისა, შეზღუდული შესაძლებლობის მქონე ადამიანებს მაინც ვერ აღიქვამენ საზოგადოების სხვა წევრების თანასწორებად. ამიტომ, ხშირად ფიქრობენ, რომ ისინი ავადმყოფები, აგრესიულები, არაპროფესიონალები არიან:

„საზოგადოება უნდა მიეჩვიოს ჩვენს სახეებს. ჩვენ უნდა დავაინტერესოთ ისინი, რომ მოვიდნენ ახლოს, გაგვიცნონ. სტიგმა და ცრუ წარმოდგენები მხოლოდ სწორი ინფორმაციის მიღებით მარცხდება”, - ამბობს მერაბი.

კამპანიის პრეზენტაციაზე ნილს სკოტი, გაერო-ის მუდმივი კოორდინატორი საქართველოში, ასევე კარლო ნატალე, ევროკავშირის წარმომადგენლობის ხელმძღვანელის მოადგილე და მონიკა აზიმი, ამერიკის საერთაშორისო განვითარების სააგენტოს დემოკრატიის მმართველობისა და სოციალური განვითარების ოფისის დირექტორი იმყოფებოდნენ.

სიტყვით გამოვიდა საქართველოს პირველი ლედი, მაკა ჩიჩუა. მან კამპანიის ორგანიზატორებს მადლობა გადაუხადა და იმედი გამოთქვა, ეს მოძრაობა დიდი სოციალური ცვლილებების საფუძველი გახდება.

რაც შეეხება კონკრეტულად კამპანიის სამომავლო გეგმებს, მაია ქურციკიძე, გაერო-ის ბავშვთა ფონდის კომუნიკაციის პროგრამის ხელმძღვანელი ამბობს, რომ ამ ორი წლის განმავლობაში დაგეგმილია სხვადასხვა აქტივობა, მაგალითად, შეიქმნება ვიდეო და ფოტოისტორიები, კომიქსები, მოეწყობა აქციები, კონკურსები, მედიის წახალისების ღონისძიებები:

„რაც მთავარია, ჩვენ მოვიცავთ საქართველოს სხვადასხვა რეგიონს. და ამ კამპანიაში უშუალოდ შეზღუდული შესაძლებლობის მქონე ადამიანები და მათი მშობლები იქნებიან აქტიურად ჩართული. ჩვენ გვინდა, ყველას დავანახოთ, ამ ადამიანების შესაძლებლობები”, - ამბობს მაია ქურციკიძე.

კომენტარები

ამავე რუბრიკაში

15 აგვისტო
15 აგვისტო

ადამიანებზე მორგებული სატრანსპორტო პოლიტ ...

გასულ კვირას გორის საკრებულოს დეპუტატების ნაწილმა ქალაქში სატრანსპორტო სამსახურის გაუქმება მოითხოვა და ულტიმატუმის ფორმი ...
11 აგვისტო
11 აგვისტო

საქართველო შემოდგომით, 1983

რეზო გიგინეიშვილის ფილმი „მძევლები“ და მისი თანამედროვე კონტექსტი იმ ოთხი ფილმიდან, რომლითაც წელს საქართვე ...
08 აგვისტო
08 აგვისტო

ბახალას საქმე

„მე დამაყენეს არჩევნის წინაშე - ადამიანურ ღირსებას, მორალსა და თავისუფლებას შორის“, -  აღნიშნა გიორგი გ ...

მეტი

^