„ქართული ოცნების" რიგებიდან დეპუტატების გარიცხვის საკითხს საპარლამენტო უმრავლესობის წევრი ნუკრი ქანთარია უარყოფს. „როგრც ქუხს ისე არ წვიმს მოგეხსენებათ და ასეა ამჟამადაც... არავინ არავის არ გაურიცხავს", - თქვა ქანთარიამ.
პარტიის ოფისში „ქართული ოცნების" თავმჯდომარესთან, ბიძინა ივანიშვილთან გამართული შეხვედრის შემდეგ ნუკრი ქანთარიამ განაცხადა, რომ ვინმეს გარიცხვის საკითხი არ განხილულა.
მედიაში ვრცელდებოდა ინფორმაცია, რომ გარიცხულებს შორის იყვნენ დეპუტატი ოთარ ჩრდილელი და მის გარდა კიდევ რამდენიმე დეპუტატი, რომელმაც მოსამართლეთა უვადოდ დანიშვნის შეჩერების შესახებ ეკა ბესელიასა და კიდევ 8 დეპუტატის მომზადებულ კანონპროექტს კენჭისყრაზე მხარი დაუჭირა.
დღეს „ქართული ოცნება“ და საპარლამენტო უმრავლესობა დატოვა იურიდიულ საკითხთა კომიტეტის ყოფილმა თავმჯდომარემ ეკა ბესელიამ. საპარლამენტო უმრავლესობიდან, აგრეთვე დღეს წავიდა ბექა ნაცვლიშვილი. ხოლო, გუშინ უმრავლესობიდან წავიდა ლევან გოგიჩაიშვილი.