„გაათავისუფლეთ სასამართლო" - უზენაეს სასამართლოსთან შეკრებილმა მოქალაქეებმა პარლამენტთან გადაინაცვლეს.
აქტივისტები, როგორც თავად აცხადებენ, „სასამართლოს კლანსა" და ხელისუფლებას შორის გარიგებას აპროტესტებენ.
აქციის სპეციალურად დაიგეგმა პარლამენტში სასამართლოს საკითხზე შექმნილი სამუშაო ჯგუფის შეხვედრის პარალელურად. შეხვედრაში პარლამენტის თავმჯდომარის, ირაკლი კობახიძის თაოსნობით მონაწილეობენ იუსტიციის საბჭოს მოსამართლე და არამოსამართლე წევრები, აგრეთვე სააპელაციო სასამართლოს მოსამართლე ლევან მურუსიძე. შეხვედრაზე იმყოფებიან: კოალიცია „დამოუკიდებელი და გამჭვირვალე მართლმსაჯულებისთვის" წარმომადგენელი გიორგი მშვენიერაძე და დიპლომატიური კორპუსის წარმომადგენლები.
სამუშაო ჯგუფი უზენაესი სასამართლოს მოსამართლეობის კანდიდატთა შერჩევის პროცედურასა და კრიტერიუმებს განიხილავს.
სამუშაო ჯგუფის შეხვედრიდან გამოსვლის შემდეგ აქციის მონაწილეებს შეუერთდა იუსტიციის უმაღლესი საბჭოს არამოსამართლე წევრი ანა დოლიძე.
