დიდი ბრიტანეთის პრემიერ-მინისტრმა, ტერეზა მეიმ გადადგომის გადაწყვეტილება მიიღო. პრემიერმა თანამდებობიდან წასვლის შესახებ რამდენიმე წუთის წინ განაცხადა.

ტერეზა მეი დიდი ბრიტანეთის პრემიერი სამი წლის განმავლობაში იყო. მას შემდეგ, რაც ბრიტანელებმა ევროკავშირიდან გასვლის შესახებ რეფერნდუმს მხარი დაუჭირეს, დევიდ კამერონისგან ეს თანამდებობა ტერეზა მეიმ ჩაიბარა. მას დაევალა ბრექსიტის გეგმა და მოლაპარაკებები ბრიუსელთან, რაც საბოლოოდ წარმატებით ვერ დასრულდა. დიდმა ბრიტანეთმა ევროკავშირიდან გასვლა რამდენჯერმე გადადო, თუმცა გეგმაზე ვერც თავად ქვეყნის პოლიტიკური ძალები შეჯერდნენ და ვერც ბრიუსელთან დასრულდა მოლაპარაკებები.

„მას შემდეგ რაც პრემიერ-მინისტრი გავხდი, ჩემი გამუდმებული მცდელობა იყო, რომ გაერთიანებული სამეფოს ხელისუფლებას ემუშავა არა მხოლოდ პრივილეგირებულთათვის, არამედ თითოეული მოქალაქისთვის. ასევე, ვცდილობდი, პატივი მეცა რეფერენდუმის შედეგებისადმი. მე ჩემი მაქსიმუმი გავაკეთე“, - განაცხადა ტერეზა მეიმ.

მეის მომზადებული ბრექსიტის გეგმა რამდენჯერმე ჩავარდა. მისი თქმით, ამის გამო, პირადად ნანობს და თანამდებობას ტოვებს. 7 ივნისიდან, როცა მეი პარტიის ლიდერის პოსტს დატოვებს, კონსერვატორებმა ახალი ლიდერი უნდა აირჩიონ, რომელიც ქვეყნის პირველი პირიც გახდება.