15.05.2012
ომბუდსმენი პატიმრის სამკურნალო დაწესებულებაში გადაყვანას ითხოვს
გლდანის N8 დაწესებულების პატიმარი პ.კ. დამოუკიდებლად ვერ გადაადგილდება, მას არ აქვს სპეციალური ეტლი და “უზრუნველყოფილი არ არის შეზღუდული შესაძლებლობის მქონე პირისათვის აუცილებელი საშუალებებით და გარემოთი” პატიმარი ბუნებრივი მოთხოვნილებების დასაკმაყოფილებლად დახმარებას თანასაკნელებს სთხოვს.
ამის შესახებ მსჯავრდებულმა სახალხო დამცველს განუცხადა, რომელიც სასჯელაღსრულების პრობაციისა და იურიდიული დახმარების საკითხთა მინისტრს, ხათუნა კალმახელიძეს საგანგებო რეკომენდაციით მიმართავს.
აღნიშნულ რეკომენდაციაში ომბუდსმენი ,საქართველოს სახალხო დამცველის შესახებ“ ორგანული კანონის 21-ე მუხლის ,,ბ“ ქვეპუნქტს ეყრდნობა და მინისტრისგან პატიმრის N18 სამკურნალო დაწესებულებაში დაუყოვნებლივ გადაყვანას ითხოვს. რადგან “გლდანის #8 დაწესებულებაში არსებული პირობები არ არის ადეკვატური მისი სათანადო მკურნალობისა და მოვლისათვის.”
ომბუდსმენი დამოუკიდებელი სასამართლო ექსპერტიზის ცენტრის, შპს ,,ვექტორის“ ალტერნატიული კომისიის სასამართლო-სამედიცინო ექსპერტიზის დასკვნაზე მიუთითებს, რომელიც ადასატურებს, რომ პ. კ.-ს დგომა და სიარული მხოლოდ დამხმარე საშუალებებით შეუძლია.
ირაკლი კაკაბაძე