15.05.2012
ომბუდსმენი სასჯელაღსრულების მინისტრის ბრძანებას უკან გადადგმულ ნაბიჯს უწოდებს
2012 წლის შვიდ მაისს სასჯელაღსრულების საკითხთა მინისტრმა ხათუნა კალმახელიძემ გამოსცა ბრძანება N63, რომლის მიხედვითაც, რვა დაწესებულებისთვის ახალი ლიმიტები განისაზღვრა და პატიმართა დასაშვები რაოდენობა 1724 ადგილით გაიზარდა.
სახალხო დამცველი მიიჩნევს, რომ ბოლო ხანს, სასჯელაღსრულების დაწესებულებებში ისეთი მნიშვნელოვანი ინფრასტრუქტურული ცვლილებები არ განხორციელებულა, რაც შესაძლებელს გახდიდა ლიმიტის გაზრდას. ომბუდსმენის აზრით “7 მაისის ბრძანება ერთმნიშვნელოვნად უნდა შეფასდეს, როგორც უკან გადადგმული ნაბიჯი”
გიორგი ტუღუშის ინფორმაციით, იმ დაწესებულებების ლიმიტიც გაიზარდა, რომლებიც ინდივიდუალური საწოლით ყველა პატიმარს აქამდეც ვერ უზრუნველყოფდა. “კერძოდ, საუბარია თბილისის N1 და ზუგდიდის N4 დაწესებულებებზე, რომლებიც სრულად არის ამორტიზებული და გასაუქმებელია და რომელთა ლიკვიდაციაზე სახალხო დამცველმა არაერთი რეკომენდაცია გასცა. იგივე შეეხება N12 დაწესებულებას, სადაც საყოფაცხოვრებო პირობები არასახარბიელოა”. - ნათქვამია სახალხო დამცველის განცხადებაში.
ომბუდსმენი იმ ფაქტითაცაა შეშფოთებული, რომ “აზრდილი ლიმიტების ფარგლებში სასჯელაღსრულების დაწესებულებების უმეტეს ნაწილში პატიმრები საქართველოს კანონმდებლობით გათვალისწინებული საცხოვრებელი ფართობითაც ვეღარ ისარგებლებენ, რომელიც CPT-ის მიერ რეკომენდირებულ ევროპულ სტანდარტზე, 4 კვ.მ.-ზე გაცილებით ნაკლებია.”
ტუღუში აღნიშნავს, რომ მინისტრის ბრძანებამ მხოლოდ ფორმალურად შენიღბა გადატვირთულობა, რომელიც სასჯელაღსრულების ზოგიერთი დაწესებულებების პრობლემას წარმოადგენს. ომბუდსმენი ამ შეაფსებისას საკუთარ მოხსენებებთან ერთად წამების პრევენციის ევროპული კომიტეტის (CPT) ანგარიშებსაც ეყრდნობა.
სახალხო დამცველის თქმით: “გადატვირთულობის პრობლემა, საგრძნობლად ამძიმებს როგორც პატიმრების ყოველდღურ ყოფას, ასევე უარყოფითად აისახება მათ ფიზიკურ თუ ფსიქიკურ ჯანმრთელობაზე.
გადატვირთულობასთან ბრძოლისთვის, აუცილებელია კომპლექსური ღონისძიებების გატარება, მათ შორის, სისხლისსამართლებრივი პოლიტიკის გადახედვა, ალტერნატიული სასჯელის ზომების უფრო აქტიური გამოყენება, პირობით ვადამდე გათავისუფლების სისტემის ეფექტური მუშაობის უზრუნველყოფა”
ბექა დავითულიანი