26.05.2012
ბიზნესმენი ანზორ ქოქოლაძე პატრიარქის შუამდგომლობით შეიწყალეს
საქართველოს პრეზინდეტმა ქვეყნის დამოუკიდებლობის დღესთან დაკავშირებით, 66 მსჯავრდებული შეიწყალა, - ამის შესახებ სასჯელაღსრულების, პრობაციისა და იურიდიული დახმარების საკითხთა მინისტრმა ხათუნა კალმახელიძემ დღეს გამართულ ბრიფინგზე განაცხადა.
სამინისტროს ინფორმაციით, შეწყალებულმა მსჯავრდებულები სასჯელაღსრულების სისტემას დღის განმავლობაში დატოვებენ.
შეწყალებულთა შორისაა ელიტ-ელექრონიქსის დამფუძნებელი, ბიზნესმენი ანზორ ქოქოლაძე. ინფორმაცია "ლიბერალთან" საუბარში ბიზნესმენის ადვოკატმა მაია ხუციშვილმა დაადასტურა. მისი თქმით, ქოქოლაძის გვარი შეწყალებულთა სიაში საქართველოს პატრიარქის შუამდგომლობით მოხვდა. ელიტ-ელექტრონიკსის დამფუძნებელმა ციხე უკვე დატოვა.
ქოქოლაძე სასჯელს 2010 წლიდან იხდიდა. მას ბრალად "სხვადასხვა უკანონო გარიგებისა და სახელმწიფოს წინაშე არსებული ვალდებულების შესრულებისთვის თავის არიდება" ედებოდა, 2011 წლის 21 აპრილს კი 7 წლითა და 6 თვით თავისუფლება აღკვეთა მიუსაჯეს. პატიმრობაში მყოფ ქოქოლაძეს ახალი ბრალდება დეკემბერში წარუდგინეს. სახელმწიფო ბიზნესმენს "თაღლითობასა და უკანონო ფულის ლეგალიზაციას" ედავებოდა.
ნინო ბექიშვილი