15.06.2012
ბიძინა ივანიშვილს სააპელაციო სასამართლომ ჯარიმის ოდენობა გაუნახევრა
სააპელაციო სასამართლომ ბიძინა ივანიშვილის სარჩელი ნაწილობრივ დააკმაყოფილა. ივანიშვილმა 126 მილიონი ლარის ნაცვლად 63 მილიონი ლარი უნდა გადაიხადოს. სასამართლომ იმსჯელა და ივანიშვილს შემოწირულობის ათმაგი ოდენობის ნაცვლად ხუთმაგი ოდენობა განუსაზღვრა.
იმავე პრინციპით იხელმძღვანელა სასამართლომ მეორე პროცესზე და ივანიშვილს 22 მილიონი ლარის ნაცვლად 11 მილიონი ლარის ოდენობის ჯარიმის გადახდა დააკისრა.
ამ საქმეზე სასამართლო განხილვა გუშინვე დასრულდა და დღეს მხოლოდ გადაწყვეტილება გამოქვეყნდა, პირველი, სატელიტური ანტენების დამონტაჟებასთან დაკავშირებული სასამართლო პროცესი კი დილიდან მიმდინარეობდა და მასზე გლობალ ტვ-ის ბიზნეს გეგმას განიხილავდნენ.
სასამართლომ მოისმინა ბიზნესგეგმის ანალიზი, რომელიც ექპერტიზის ეროვნული ბიუროს სპეციალისტებმა მოამზადეს. დასკვნის მიხედვით პროექტი წამგებიანი იყო. ამ დასკვნის მიხედვით კონტროლის პალატის წარმომადგენლები ამტკიცებდნენ, რომ ანტენების დარიგების აქცია არაკომერციული იყო და მხოლოდ საარჩევნო მიზნებს ემსახურებოდა.
ადვოკატების თქმით, მათთვის ბევრი რამ ნათელი არ იყო, ამის გამო დასკვნის შემდგენელი ექსპერტების გიორგი ჩადუნელის და შოთა ივანაშვილის მოწმის სახით დაკითხვას ითხოვდნენ. ადვოკატები ამბობდნენ, რომ მათთვის ზოგიერთი ფინანსური ცნება და კატეგორია გაურკვეველი იყო. მათ სურდათ ფინანსისტის მოესმინათ უშუალო განმარტება, თუ რატომ არ არის პროექტი რენტაბელური.
ადვოკატები ამტკიცებდნენ, რომ კონტროლის პალატის ფინანსური გაანგარიშება და ექსპერტების დასკვნა ერთმანეთთან შეუსაბამოა, ამიტომ კონტროლის პალატის დასკვნის საქმიდან ამოღებას ითხოვდნენ.
კონტროლის პალატის ფინანსური მონიტორინგის სამსახურის წარმომადგენლმა ვახტანგ კეჟერაძემ განაცხადა, რომ ამ ორ დასკვნაში არავითარი შეუსაბამობა არ არის. მოსამართლემ ბიძინა ივანიშვილის ადვოკატების შუამდგომლობები არ დააკმაყოფილა.
სასამართლო პროცესს რესპუბლიკური პარტიის წევრი თინა ხიდაშელი ესწრებოდა. ერთ-ერთი შესვენების დროს, ხიდაშელმა კონტროლის პალატის წარმომადგენელს ურჩია, რომ მათ ყურადღება ხელისუფლების მიერ ამომრჩევლების მოსყიდვის ფაქტებსაც მიაქციონ.
ანა ნაცვლიშვილი