უკიდურესად მკაცრია ნარკოპოლიტიკა, უკიდურესად მაღალია პირველადი მოხმარების შემთხვევაში ჯარიმა, - ამის შესახებ Human Rights Watch-ის წარმომადგენელი სამხრეთ კავკასიაში გიორგი გოგია აცხადებს, რომელიც საქართველოში ადამიანის უფლებათა დაცვის მდგომარეობის შესახებ სახალხო დამცველის ყოველწლიური ანგარიშის თემაზე გამართულ საჯარო დებატებში მონაწილეობდა.

მისი თქმით, საქართველოში სიცოცხლის უფლების დარღვევის წინაპირობას ნარკოტიკის გადაჭარბებული დოზის მოხმარებისას ვაწყდებით.

მისი თქმით, როცა ხდება სასწრაფოს გამოძახება, და რადგან ზარი 112-ში შედის, სასწრაფოს ყოველთვის მოყვება პოლიცია. „ამის გამო, ძირითადად, თავს იკავებენ გამოძახებისგან და დგება სიცოცხლის მოსპობის საფრთხე", - ამბობს გოგია.

აღსანიშნავია, რომ შრომის, ჯანმრთელობისა და სოციალური დაცვის მინისტრმა ზედოზირებასთან დაკავშირებით, 2000 წლის 5 დეკემბრის ბრძანებაში ცვლილებები უკვე შეიტანა. ბრძანების ძველი რედაქციით, მოწამვლაზე ეჭვის შემთხვევაში, როდესაც პირი უგონო მდგომარეობაში იმყოფებოდა, სამედიცინო დაწესებულებიდან სამართალდამცავი ორგანოებისთვის ცნობის მიწოდება სავალდებულო იყო. ცვლილების მიხედვით, ზედოზირების შემთხვევაზე სამართალდამცავი ორგანოებისთვის მიმართვა სავალდებულო აღარაა.