ნაფეტვრების მიმდებარე ტერიტორიაზე, ვერეს ხეობის ზედა წელში ნაგავი, ხე-ტყის და საყოფაცხოვრებო ნარჩენები ყრია.
„ლიბერალი" დაინტერესდა, ნაფეტვრებთან დაყრილი მასა სტიქიის ნარჩენებია თუ არა. როგორც „ლიბერალს" თბილისის მერიის პრესსამსახურის უფროსმა, მაგდა პოპიაშვილმა უთხრა, ინფორმაცია გუშინ გადაამოწმა: „კატეგორიულად მითხრეს, რომ სტიქიის შედეგად გატანილი მასალა ნაფეტვრებთან არ იყრება. იგი ნაგავსაყრელზე მიაქვთ".
თვითმხილველმა დათო თაბუკაშვილმა „ლიბერალს" უთხრა, რომ გუშინ, დაახლოებით 17:00 საათისთვის, ნაფეტვრების ტერიტორიიდან, რესტორან „ნაფეტრვებთან“ მისვლამდე დასუფთავების 5 მანქანა მოვიდა, რომელიც ქალაქიდან მოტანილი შლამით და ნაშალი მასალით იყო დატვირთული.
„მე გავაჩერე და ვუთხარი, რა აზრი ჰქონდა ამ ნაგვის იქ დაყრას, თუ წვიმის შემდეგ ყველაფერს ვერეში ჩაიტანდა. მათ გვიპასუხეს, ახლა ეს ამ 5 მანქანით მოტანილი ნაგავი დაგვაყრევინეთ და შემდეგში გლდანის ნაგავსაყრელზე წავიღებთო. თქვეს, რომ ფორსმაჟორში მუშაობდნენ და გლდანამდე ნაგვის წაღებას დროებით აქ დაყრა არჩიეს“, - ამბობს თვითმხილველი.
„ლიბერალი“ ნაფეტვრის ტერიტორიიდან ფოტომასალას გთავაზობთ.