საბერძნეთის მემარცხენე პოლიტიკური ლიდერი ალექსის ციპრასი მთავრობაში ფურორით დაბრუნდა - მან კვირას გამართულ ვადამდელ არჩევნებში კვლავ დამაჯერებელი გამარჯვება მოიპოვა.
არჩევნებმა აჩვენა, რომ ევროპის ყველაზე რადიკალი მემარცხენე ლიდერი საბერძნეთის მთავარ პოლიტიკურ ფიგურად დარჩება, მიუხედავად იმისა, რომ გასულ თვეს მას საკუთარი პარტიის წევრები გაემიჯნენ.
„დღეს ევროპაში საბერძნეთი და ბერძენი ხალხი არის სინონიმი გამძლეობისა და ღირსების. ეს ბრძოლა სრული საარჩევნო ციკლის განმავლობაში გაგრძელდება. მე ოთხი წლით ვრჩები“, - მიმართა ათენის ცენტრალურ მოედანზე შეკრებილ ამომრჩევლებს ალექსის ციპრასმა.
მემარცხენე ლიდერს არ დაუზუსტებია როგორ აპირებს საბერძნეთი 97 მილიარდ დოლარის ოდენობის ვალის გასტუმრებას, თუმცა მისი პარტია „სირიზას" წინასაარჩევნო კამპანია ამ თემაზე იყო აწყობილი.
„ჩვენ წინ სირთულეები გველის, მაგრამ ვიცი, საით მივდივართ. მთავარია მყარად ვდგავართ და გვაქვს პერსპექტივა. სიტუაციიდან სასწაული ვერ გამოგვიყვანს - ყველას ერთად მძიმე შრომა მოგვიწევს“, - განაცხადა ალექსის ციპრასმა.