„მიუხედავად ჩემი უღრმესი პატივისცემისა ნებისმიერი დონის სასამართლოების მიმართ, საკონსტიტუციო სასამართლო არის პირდაპირ „ნაციონალური მოძრაობის“ დანამატი, მეტი არაფერი“, - საქართველოს პარლამენტის საფინანსო-საბიუჯეტო კომიტეტის თავმჯდომარე თამაზ მეჭიაური „ლიბერალთან“ საუბარში საკონსტიტუციო სასამართლოს მიერ ცოტა ხნის წინ მიღებულ გადაწყვეტილებას აფასებს. საკონსტიტუციო სასამართლომ განხილვაში მიიღო საპარლამენტო ოპოზიციის სარჩელი საბანკო ზედამხედველობის სამსახურის ეროვნული ბანკიდან გამოყოფის შესახებ. სასამართლომ რამდენიმე საათის წინ საფინანსო ზედამხედველობის სააგენტოს ფუნქციონირება შეაჩერა.
„სხვას არც მოველოდი. თუმცა მეგონა, გაცილებით პრაგმატულად უყურებდნენ მოვლენებს. ეს რომ იმ შედეგს ვერ მოუტანს, რისთვისაც ეს გადაწყვეტილებაა გათვლილი, ამას ვნახავთ“, - ამბობს მეჭიაური.
მისი განმარტებით, მოსახლეობაში ამ გადაწყვეტილების გახმაურება დადებითად არ აისახება ლარის კურსზე.
„არ არის გამორიცხული, საბოლოო გადაწყვეტილება საკონსტიტუციო სასამართლომ ისე მიიღოს, როგორც მიაჩნიათ, ანუ რამდენად სასარგებლო იქნება „ნაციონალური მოძრაობისთვის“. ეს გათვლილია დესტაბილიზაციაზე. მინდა გითხრათ, რომ არსებობს სხვა ბერკეტებიც, რომლითაც შეიძლება სიღრმისეული დანახვა, რა ხდება ეროვნულ ბანკში. თუნდაც საგამოძიებო კომისია“, - ამბობს პარლამენტის საფინანსო-საბიუჯეტო კომიტეტის თავმჯდომარე.
