თურქეთის ევროკავშირში გაწევრიანებაზე განაცხადს ბლოკი მომდევნო თვეში ეკონომიკურ პოლიტიკაზე მოლაპარაკებების გახსნით უპასუხებს - ევროპის საკითხებში თურქეთის ახალმა მინისტრმა, ვოლკან ბოზკირმა განაცხადა, რომ ევროკავშირი თანახმაა, გაყინული მოლაპარაკებები განაახლოს.
აქამდე პროცესს კვიპროსის რესპუბლიკასთან თურქეთის უთანხმოება და ადამიანის უფლებების დაცვის კუთხით პრობლემური სიტუაცია აფერხებდა, მაგრამ ევროკავშირს სურს, თურქეთი წაახალისოს და ევროპაში მიგრანტების გადინება შეწყვიტოს.
თურქეთის ევროკავშირში გაერთიანება აზრთა სხვადასხვაობას იწვევს. ბევრი ევროპელი პოლიტიკოსი, მათ შორის გერმანის კანცლერი ანგელა მერკელი, ამის წინააღმდეგია. მათი არგუმენტით, ასეთი დიდი ქვეყანა, რომლის ძირითადი მოსახლეობა მუსლიმია, ხოლო რეგიონები - ღარიბი, ევროკავშირის ზოგად სურათს შეცვლის.
თურქეთის მოლაპარაკებები ევროკავშირთან 2005 წელს დაიწყო და აქამდე მხოლოდ 13 მუხლზეა გახსნილი.
ევროკავშირის კანონმდებლობის მე-17 მუხლი ეკონომიკასა და მონეტარულ პოლიტიკას ეხება. როგორც ვოლკან ბოზკირი Twitter-ის საკუთარ გვერდზე წერს, 14-15 დეკემბერს ბრიუსელში მოლაპარაკებებზე სწორედ ამ საკითხების განხილვას დაიწყებენ.
ევროკომისია მოუწოდებს თურქეთს, გააუმჯობესოს ადამიანის უფლებების დაცვის ხარისხი ქვეყანაში, გააძლიეროს დემოკრატია და გაატაროს უფრო ღრმა სასამართლო რეფორმა.
წყარო: BBC