„ერთიანი ნაციონალური მოძრაობის" წევრ დავით ბაქრაძის თქმით, ევროკომისარმა იოჰანეს ჰანმა ოპოზიციის წარმომადგენლებთან შეხვედრაზე აღნიშნა, რომ ევროკავშირი მზად არის ვიზალიბერალიზაციისთვის და თუ რამე გაუთვალისწინებელი არ მოხდა, „რამე ისეთი, როგორსაც ცოტა ხნის წინ „რუსთავი 2-თან" მიმართებაში ჰქონდა ადგილი, დეკემბერში გადაწყვეტილება დადებითი იქნება".
„ვიზალიბერალიზაციის დადებით გადაწყვეტილებასთან ერთად ბრიუსელიდან მოდის მკაფიო სიგნალები ხელისუფლების მისამართით, რომ ევროპული საქართველო ნიშნავს დემოკრატიულ საქართველოს, ნიშნავს საქართველოს, სადაც არ ხდება ოპოზიციური არხების დევნა, პოლიტიკური ძალადობა და ოპოზიციის წევრების პოლიტიკური დაპატიმრებები" - ამბობს ბაქრაძე.
19 ნოემბერს პრემიერ-მინისტრმა ირაკლი ღარიბაშვილმა განაცხადა, რომ „ერთიანი ნაციონალური მოძრაობის" წევრები, დავით ბაქრაძე და გიორგი კანდელაკი ევროკავშირში ითხოვდნენ, საქართველოსთვის ვიზალიბერალიზაცია არ მიეცათ.
