დედაქალაქის საკრებულომ თბილისში რეგისტრირებული სოციალურად დაუცველი სტუდენტების დაფინანსების წესში ცვლილებას მხარი დაუჭირა.
როგორც ჟურნალისტებს თბილისის მერიის განათლების, სპორტისა და ახლგაზრდულ საქმეთა საქალაქო სამსახურის ხელმძღვანელმა, ირაკლი გვილავამ განუცხადა, სტუდენტების რანჟირება ახალი წესით მოხდება და ის სტუდენტები, რომლებიც მაღალი აკადემიური მოსწრებით და კარგი შედეგით გამოირჩევიან, 100%-ით დაფინანსდებიან. არსებული წესით, სოციალურად დაუცველი სტუდენტები თბილისის მერიისგან 50%-ით ფინანსდებოდნენ.
„ამ შემთხვევაში, ცვლილებების თანახმად, სოციალურად დაუცველი სტუდენტები ისევ ფინანსდებიან, თუმცა ხდება წახალისება იმ სტუდენტების, რომლებსაც აქვთ მაღალი აკადემიური მოსწრება, შესაბამისად, ისინი დაფინანსდებიან 70-დან 100%-მდე, დანარჩენები კი - 50%-ით. აღნიშნული ცვლილება 2016 წლის იანვრიდან შევა ძალაში", - განაცხადა გვილავამ.