"მე არ ვარ საშიში" - ამ ლოზუნგით თბილისში, მტკვირის მარჯვენა სანაპიროზე მარჯვენასაჭიანი ავტომობილების მძღოლებისა და დილერების საპროტესტო აქცია გაიმართა. მათი განცხადებით, გაუმართლებელია ის მიზეზები, რომლითაც ხელისუფლება მარჯვენასაჭიანი ავტომობილების რეგისტრაციის აკრძალვას აპირებს. აქციის მონაწილეთა ინფორმაციით, თუ შსს და ხელისუფლება რამდენიმე თვეში აკრძალვას არ გააუქმებენ, აქციები გაგრძელდება და ისინი პროტესტს უფრო მწვავე ფორმით გამოხატავენ.
მანქანათა უწყვეტი ჯაჭვი, რომელიც მძღოლებმა და დილერებმა პროტესტის ნიშნად გააკეთეს, მშრალი ხიდიდან თამარ მეფის ხიდამდე გრძელდებოდა.
მარჯვენასაჭიანი ავტომობილების მძღოლებმა მსგავსი გამაფრთხილებელი აქცია ქუთაისში, პარლამენტის შენობის მიმდებარე ტერიტორიაზეც გამართეს. ისინიც მარჯვენასაჭიანი მანქანების რეგისტრაციის შესაძლო აკრძალვას აპროტესტებდნენ. მათი თქმით, თუ ხელისუფლება აკრძალვას არ გააუქმებს, ფართომასშტაბიან აქციებს გამართავენ.
რამდენიმე დღის წინ ცნობილი გახდა, რომ მარჯვენასაჭიანი ავტომანქანების რეგისტრაცია აიკრძალება.