კომუნიკაციების ეროვნული კომისიის თავმჯდომარის, ვახტანგ აბაშიძის განცხადებით, ოპტიკურ-ბოჭკოვანი მაგისტრალის გაყიდვის საკითხი დღის წესრგიში არ დგას.
მისი თქმით, განიხილება „კავკასუს ონლაინის" საცალო სეგმენტის გასხვისებაზე კომპანია „მობიტელისთვის", რომლის ერთ-ერთი დამფუძნებელი რუსული კომპანია „ვიმ-პელ-კომია".
„საუბარია საცალო ბაზრის სეგმენტზე და არა მაგისტრალური არხების, მათ შორის ოპტიკურ-ბოჭკოვანი ქსელების და რაც მთავარია, საქართველო-ბულგარეთის დამაკავშირებელი ოპტიკურ-ბოჭკოვანი მაგისტრალის შესახებ", - განაცხადა აბაშიძემ.
როგორც მან განმარტა, ხდება მხოლოდ სააბონენტო/საცაცო ქსელის გაყიდვა იმ ქალაქებში, სადაც „კავკასუს ონლაინის" მომხმარებელს მიეწოდება ინტერნეტი.
„თავისუფალი დემოკრატების" ლიდერის, ირაკლი ალასანიას თქმით, სტრატეგიული ოპტიკურ-ბოჭკოვანი არხი, შესაძლოა, რუსეთის ხელში აღმოჩნდეს. როგორც ირაკლი ალასანიამ „კურიერის" ეთერში განაცხადა, ხელისუფლება მის გასხვისებაზე მუშაობს.
„მიმდინარეობს მოლაპარაკება სტრატეგიული ოპტიკურ-ბოჭკოვანი არხის გასხვისებაზე, რომლითაც იღებს საქართველო ინტერნეტს და მიბმულია ევროპასთან. აღსანიშნავია, რომ აქამდე ეს იყო ქართული კომპანიის ხელში და გვაქვს ინფორმაცია, რომ, სავარაუდოდ, ამას რუსული კომპანია ვიმ-პელ-კომი შეიძლება დაეპატრონოს. ეს ინფორმაცია იმდენად მნიშვნელოვანია ჩვენი ქვეყნის უსაფრთხოებისთვის, რომ აუცილებელია, განმარტება გააკეთოს ეროვნულმა მარეგულირებელმა კომისიამ. დღევანდელ მსოფლიოში იმდენად დიდია რისკი კიბერთავდასხმების, რომ ეს საკმაოდ საგანგაშო ინფორმაციაა", - განაცხადა ირაკლი ალასანიამ.
