საქართველოს პრემიერ-მინისტრის გიორგი კვირიკაშვილის განცხადებით, გიორგი გაჩეჩილაძესთან შეხვედრის დროს მან არ იცოდა „მაესტროში“ განვითარებული მოვლენების შესახებ.
„საერთოდ არ ვიცოდი, ეს სიტუაცია თუ ხდებოდა „მაესტროში", რომ მცოდნოდა, ალბათ, ცოტა სხვანაირად მოვიქცეოდი და შეიძლებოდა თავი შემეკავებინა შეხვედრისგან, ამხელა სპეკულაციები და მითქმა-მოთქმა რომ არ გამომეწვია,“ - განაცხადა პრემიერმა.
კვირიკაშვილის თქმით, შეხვედრისა მათ ისაუბრეს გაჩეჩილაძის მეგობარზე, რომელსაც წინა ხელისუფლების დროს პრობლემები შეექმნა.
„არავისთან არაფერი დასამალი არ მაქვს. საერთოდ არ მახასიათებს ტყუილი, მაქვს ტყუილის აუტანლობა. 23:00 საათზე შევხვდი. ამ სპეკულაციებზე აღარ შემიძლია უკვე პასუხების გაცემა. 23:00 საათი სამუშაო დრო, მე მგონი, არ არის და მქონდა საუბარი გიორგი გაჩეჩილაძის ერთ-ერთი მეგობრის თაობაზე, რომელსაც წინა ხელისუფლების პერიოდში რაღაც პრობლემები ჰქონდა", - აღნიშნა კვირიკაშვილმა.