„სამოქალაქო კოდექსში ეს წერია. „რესპუბლიკელებს" ამ საკითხზე არც გვიმსჯელია, კონსტიტუციაში ეს ნორმა არის", - უთხრა ფრაქცია „ქართული ოცნება - რესპუბლიკელების" წევრმა, პარლამენტის იურიდიულ საკითხთა კომიტეტის თავმჯდომარემ ვახტანგ ხმალაძემ „ლიბერალს".  

„მე ვერ ვხედავ კონსტიტუციაში ცვლილების აუცილებლობას, რადგან კანონით ეს საკითხი დარეგულირებულია", - ამბობს ხმალაძე. 

მოძრაობა „ეროვნულების" წარმომადგენლის, სანდრო ბრეგვაძის თქმით, დღეს ისინი პარლამენტში საკონსტიტუციო შესწორების პროექტს შეიტანენ. მისი თქმით, შესწორების არსი ისაა, რომ ქორწინება არის ოჯახის შექმნის მიზნით მამაკაცისა და ქალის ნებაყოფლობითი კავშირი, რომელიც ემყარება მეუღლეთა უფლებრივ თანასწორობას.

საქართველოს მოქმედი კონსტიტუციის 36-ე მუხლის თანახმად,

1. ქორწინება ემყარება მეუღლეთა უფლებრივ თანასწორობასა და ნებაყოფლობას.

2. სახელმწიფო ხელს უწყობს ოჯახის კეთილდღეობას.

3. დედათა და ბავშვთა უფლებები დაცულია კანონით. 

საქართველოს სამოქალაქო კოდექსში, რომელიც ქორწინების ცნებას განსაზღვრავს, აღნიშნულია, რომ ქორწინება არის ოჯახის შექმნის მიზნით ქალისა და მამაკაცის ნებაყოფლობითი კავშირი, რომელიც რეგისტრირებულია საქართველოს იუსტიციის სამინისტროს მმართველობის სფეროში მოქმედი საჯარო სამართლის იურიდიული პირის – სახელმწიფო სერვისების განვითარების სააგენტოს ტერიტორიულ სამსახურში.