„სხდომაზე მიიღეს 1884 კვადრატული მეტრი ფართობის მიწის ნაკვეთის სრულიად საქართველოს სამოციქულო ავტოკეფალური მართლმადიდებლური ეკლესიისთვის გადაცემის გადაწყვეტილება. მედიაში არასწორად გავრცელდა, რომ თითქოს სპორტული კომპლექსი გადაეცა ეკლესიას, მართალი გითხრათ, არ ვიცი საიდან მოიტანეს“, - როგორც „ლიბერალს“ საკრებულოს პრესსამსახურში უთხრეს აღნიშნული მიწის ნაკვეთი ვარკეთილი 3-ის მე-4 მიკრორაიონის 407-ე კორპუსის მიმდებარედ მდებარეობს.
დედაქალაქის მუნიციპალიტეტის საკრებულოში სხდომაზე თანხმობა მიეცა სრულიად საქართველოს სამოციქულო ავტოკეფალური მართლმადიდებლური ეკლესიისთვის ვარკეთილი 3-ში მდებარე მიწის ნაკვეთის პირდაპირი განკარგვის ფორმით პრივატიზების შესახებ საკითხს.
იმავე სხდომაზე დეპუტატებმა დღის წესრიგით გათვალისწინებულ შვიდ საკითხზე იმსჯელეს.
„მათგან, თანხმობა მიეცა თბილისის მერიის მ.კეკელიძის სახელობის კალათბურთის ოლიმპიური მზადების სპორტული ცენტრის და მიხეილ კეკელიძის სახელობის ბავშვთა და მოზარდთა კალათბურთის სასახლის“ ლიკვიდაციას, ამასთან ძალადაკარგულად გამოცხადდა თბილისის მუნიციპალიტეტის საკრებულოს განკარგულება ა(ა)იპ ,,კალათბურთის განვთარების სპორტული ცენტრის შექმნის თაობაზეც.
წარმოდგენილი ცვლილების თანახმად, თბილისის მუნიციპალიტეტის მთავრობამ მიზანშეწონილად მიიჩნია აკაკი წერეთლის გამზირზე არსებული უძრავი ქონების სახელმწიფოსთვის საკუთრებაში სახელმწიფო ორგანოს მიერ შემდგომი გადაწყვეტილების მიზნით გადაცემა.
აქედან გამომდინარე, აღნიშნული უძრავი ქონება შპს „ზაზა ფაჩულიას აკადემიას“ სარგებლობის უფლებით, უზურფრუქტის ფორმით გადაეცა. ხოლო მეორე შემთხვევაში მოხდა თბილისში კოსტავას ქუჩაზე მდებარე „მ. კეკელიძის სახელობის ბავშვთა და მოზარდთა კალათბურთის სასახლესთან“ გაფორმებული უსასყიდლო უზურფრუქტის შეწყვეტა და ქონების სახელმწიფოსთვის უსასყიდლო საკუთრებაში გადაცემა, რამაც საკრებულოს ზემოთაღნიშნული განკარგულების ძალადაკარგულად გამოცხადების აუცილებლობა გამოიწვია“, - ნათქვამია საკრებულოს განცხადებაში.