ქორწინების საკითხთან დაკავშირებით საკონსტიტუციო ცვლილებების პროექტი პარლამენტში ინიცირებულია. მისი ინიციატორი პარლამენტის 80 წევრია, რომელთა შორის ფრაქცია „თავისუფალი დემოკრატების" წევრებიც არიან. ხოლო ავტორი ფრაქციები - „ქართული ოცნება", „ქართული ოცნება - კონსერვატორები", „ქართული ოცნება - მრეწველები", და „ქართული ოცნება - ეროვნული ფორუმია".
პარლამენტის წევრთა ხელმოწერების ნამდვილობის შესამოწმებლად ბიურომ კონსტიტუციური კანონის პროექტი საპროცედურო საკითხთა და წესების კომიტეტს გადასცა.
პროექტის თანახმად, კონსტიტუციაში გაიწერება, რომ ოჯახის შექმნის მიზნით ქორწინება ქალისა და მამაკაცის კავშირია. კერძოდ, კონსტიტუციის 36-ე მუხლის 1-ელი პუნქტი შემდეგნაირად ჩამოყალიბდება: ქორწინება, რომელიც არის ოჯახის შექმნის მიზნით, ქალისა და მამაკაცის ნებაყოფლობითი კავშირი, მეუღლეთა უფლებრივ თანასწორობას ემყარება.
„რესპუბლიკელების" ფრაქციიდან პროექტს მხოლოდ ორი დეპუტატი, ფრიდონ საყვარელიძე და მალხაზ წერეთელი აწერენ ხელს.
16 მარტს, 12 საათზე ბიუროს სხდომა, ხოლო 13 საათზე პლენარული სხდომა გაიმართება.