თურქეთის აღმოსავლეთით, პროვინცია თუნჯელში სამხედრო ავტომანქანის აფეთქებას სამი ჯარისკაცი ემსხვერპლა. სააგენტო France-Presse-ის ცნობით, კიდევ რამდენიმე ჯარისკაცია დაშავებული. როგორც სააგენტო იუწყება, ავტომანქანა ხელნაკეთი ბომბით ააფეთქეს, რომელიც ორი ქალაქის, თუნჯელისა და ელაზიღის დამაკავშირებელ გზაზე იყო დამონტაჟებული.
ბოლო თვეების განმავლობაში ქვეყნის სამხრეთ-აღმოსავლეთ ნაწილში სისტემატურად ხდება შეტაკებები სამთავრობო ძალებსა და ამბოხებულ ქურთისტანის „მუშათა პარტიას" შორის, რომელიც თურქეთში აღიარებულია, როგორც ტერორისტული ორგანიზაცია.
ქურთისტანის „მუშათა პარტია“ იბრძვის ქურთების უფლებებისთვის და თურქეთში ავტონომიური რესპუბლიკის შექმნისთვის, სადაც ქურთებს შეეძლებათ ცხოვრება.
მარტის დასაწყისში ანკარაში აფეთქების შედეგად 37 ადამიანი დაიღუპა.
თურქეთის პრემიერ-მინისტრმა აჰმეტ დავუთოღლუმ ტერაქტის მოწყობაში ქურთისტანის „მუშათა პარტია“ დაადანაშაულა, რის შემდეგაც თურქმა სამხედროებმა დაიწყეს ავიდაბომბვა ერაყში ქურთისტანის „მუშათა პარტიის“ ბაზაზე.
