დონალდ ტრამპმა და ჰილარი კლინტონმა მორიგი გამარჯვებები ჩაიწერეს ანგარიშში სამშაბათის შიდაპარტიული არჩევნების შემდეგ, რამაც ისინი კიდევ უფრო დაახლოვა თეთრი სახლისთვის შემოდგომის საბოლოო დუელთან.

ტრამპის პოლიტიკური ძალა კიდევ ერთხელ წარმოჩინდა და 5-ვე შტატი - მერილენდი, დელავერი, პენსილვანია, კონექტიკუტი და როდ აილენდი პირწმინდად მოუგო დანარჩენ რესპუბლიკელ კანდიდატებს. რაც შეეხება ჰილარი კლინტონს, მან სერიოზული უპირატესობით გაიმარჯვა მერილენდსა და პენსილვანიაში, ასევე მოიგო დელავერი და კონექტიკუტი. ბერნი სანდერსმა მას მხოლოდ როდ აილენდში აჯობა.

ტრამპს ეს გამარჯვება ნიუ იორკში მოპოვებული ტრიუმფის შემდეგ მნიშვნელოვნად აახლოებს „რესპუბლიკური პარტიის“ არჩეულ კანდიდატობასთან და იმ საჭირო 1 237 დელეგატის ხმასთან, რომლის მიღების შემთხვევაში ტრამპი საბოლოო შიდაპარტიული შეჯიბრების გარეშე დამტკიცდება „რესპუბლიკელების" ნომინანტად.

კლინტონის გამარჯვებები ამასობაში ამტკიცებს მისი კამპანიის არგუმენტს, რომ სანდერსმა უნდა შეწყვიტოს მასზე პირადი და პოლიტიკური სახის შეტევები, რადგან თუ ჰილარი „დემოკრატების" კანდიდატი გახდება, ეს მას ტრამპთან დაპირისპირებისას დაასუსტებს.

ჰოლარი კლინტონის შესახებ ტრამპის მოსაზრებას, რომ კლინტონს მხოლოდ ქალები თუ დაუჭერენ მხარს, „დემოკრატების" კანდიდატი პასუხობს:

„ამას წინათ ბატონმა ტრამპმა ბრალი დამდო, თითქოს ვსარგებლობ იმით, რომ ქალი ვარ და ამაზე ვაწყობ საარჩევნო კამპანიას. თუ ქალების ჯანმრთელობისთვის ბრძოლა, მათთვის ალიმენტისა და თანაბარი ანაზღაურებისთვის ბრძოლა ამას ნიშნავს, დაე იყოს ასე“.

ტრამპი კი ამბობს, რომ ჰილარი კლინტონი კაცი რომ იყოს, ხმების 5%-საც ვერ მიიღებდა.

წყარო: CNN