თბილისის საქალაქო სასამართლოში რამდენიმე წუთში ლაშა ბახუტაშვილის სასამართლო პროცესი დაიწყება. იგი 2013 წელს 0,00009 გრ. (მოხმარებულ ნემსში არსებული ნარჩენისთვის) ნარკოტიკული საშუალება დეზომორფინის (ე.წ. კრაკადილი) შეძენა-შენახვის ბრალდებით დააკავეს. დეზომორფინის მცირე რაოდენობა კანონით დადგენილი არ არის, ამიტომ 0.00009 გრ. ავტომატურად დიდ ოდენობად მიიჩნევა. მას ბრალი სისხლის სამართლის კოდექსის 260-ე მუხლით აქვს წარდგენილი და 5-დან 8 წლამდე პატიმრობა ემუქრება. 

სასამართლოს ეზოში ბახუტაშვილის მხარდასაჭერად ამ წუთებში „თეთრი ხმაურის მოძრაობის" მიერ ორგანიზებული აქცია მიმდინარეობს. 

„თეთრი ხმაურის მოძრაობის" განცხადებით, დეზომორფინსა და სხვა ნარკოტიკულ ნივთიერებაზე მცირე ოდენობის არარსებობა სახელმწიფომ საკანონმდებლო ხარვეზად აღიარა. უწყებათაშორისმა საკოორდინაციო საბჭომ მისი განსაზღვრის ვალდებულებაც აიღო, თუმცა ნივთიერებებზე ადეკვატური ოდენობების დადგენა ამ დრომდე არ მომხდარა. 

„ამ ვითარებაში, მიგვაჩნია, რომ ლაშა ბახუტაშვილი სახელმწიფოს უპასუხისმგებლობის მსხვერპლია. კანონი უსამართლოა, მოქალაქეების თავისუფლების აღკვეთის მიზეზი კი - ინსტიტუტების უმოქმედობა. 
ეს არაა ერთეული შემთხვევა. მოძრაობის წევრებს ციხიდან ყოველდღიურად გვიკავშირდებიან პატიმრები, რომლებიც მიკროგრამებისთვის წლობით იხდიან სასჯელს. 

მას შემდეგ, რაც ლაშა ბახუტაშვილის მეუღლემ, ნინო მინდიაშვილმა საქმის დეტალები საჯაროდ გაახმაურა, პროკურატურამ ბრალდებულს 5 000 ლარის სანაცვლოდ პირობითი სასჯელი შესთავაზა, თუმცა სიდუხჭირის გამო, ოჯახი თანხის გადახდას ვერ ახერხებს. 

ბახუტაშვილისთვის თავისუფლების შენარჩუნების ერთადერთი გზა სასამართლოა. საკონსტიტუციო სასამართლოში ნარკოტიკულ ნივთიერებებზე მცირე ოდენობების არარსებობისთვის რამდენიმე მოქალაქე დავობს. ერთ-ერთი სწორედ ლაშა ბახუტაშვილია. საქმის მოსამართლე ლელა შკუბულიანი უფლებამოსილია, წარდგინებით მიმართოს საკონსტიტუციო სასამართლოს და შეაჩეროს საქმის წარმოება საკონსტიტუციო სასამართლოს მიერ სარჩელზე საბოლოო გადაწყვეტილების გამოტანამდე.

მიგვაჩნია, რომ მოსამართლე ლელა შკუბულიანის მიერ მსგავსი გადაწყვეტილება ერთადერთი სწორი ნაბიჯია.

დროა, აღარ დავუშვათ უსამართლო კანონის მოქმედება. დროა, მოსამართლეებმა ნებისმიერი ფორმით უარი თქვან სამარცხვინო კანონის აღსრულებაზე. დროა, ჩვენი მხარდაჭერით ვიხსნათ ჩვენივე თავისუფლება", - აცხადებს „თეთრი ხმაურის მოძრაობა"