დეპორტაციის მოლოდინში გარდაცვლილი მანანა ჯაბელიას ოჯახს რუსეთი 70 000 ევროს გადაუხდის. საქმე 2006 წლის მასობრივი დეპორტაციის მოვლენებს ეხება, როცა 51 წლის მანანა ჯაბელია მოქალაქეობის არმქონე პირთა წინასწარი დაკავების იზოლატორში გულის შეტევით გარდაიცვალა. 

მხარეთა შეთანხმებით, რუსეთის სახელმწიფომ, გარდაცვლილის ოჯახს მატერიალური და არამატერიალური ზიანის ანაზღაურების მიზნით 70 000 ევროს გადახდა, ასევე გაწეული ხარჯის ასანაზღაურებლად 3 500 ევროს გადახდა შესთავაზა, რაზეც ჯაბელიას შვილი და მეუღლე - შახი და შახი კვარაცხელიები დასთანხმდნენ. 

სასამართლოს საქმეთა მასალებში ნათქვამია, რომ იზოლატორში მიყვანისას ჯაბელიას სამედიცინო შემოწმება ჩაუტარდა და მისი ჯანმრთელობის მდგომარეობა დამაკმაყოფილებლად ჩაითვალა, თუმცა 5 დღის შემდეგ თავის ტკივილები დაეწყო და მაღალი წნევა დაუდგინდა. 

რუსეთის სააპელაციო სასამართლომ დაადგინა, რომ ჯაბელიას ბინადრობის ვადები არ დაურღვევია, მიუხედავად ამისა, იგი წინასწარი დაკავების იზოლატორში დატოვეს. 2006 წლის 2 დეკემბერს ჯაბელიას გულის შეტევა დაემართა. იზოლატორის ექიმი ადგილზე არ იმყოფებოდა, რადგან მისი სამუშაო დრო 6 საათზე მთავრდებოდა. იზოლატორის თანამშრომლებმა სასწრაფო გამოიძახეს, თუმცა ჯაბელია უკვე გარდაცვლილი დახვდათ.