დღეს, მოძრაობა „2 ივნისის“ წამომადგენლებმა და მხარდამჭერებმა არსებული ნარკოპოლიტიკის წინააღმდეგ საპროტესტო აქციები დააანონსეს.

„არ დაიჭირო!“ - ამ სლოგანით გაიმართება აქციები 2 ივნისს საქართველოს რამდენიმე ქალაქში - 18:00 საათზე თბილისში, მთავრობის კანცელარიის წინ, ასევე ბათუმში, ქუთაისსა და რუსთავში.

როგორც ერთ-ერთი ორგანიზატორი ლექსო მაჭავარიანი ამბობს, წინა წლებისგან განსხვავებით, არა მხოლოდ მარიხუანის, არამედ ყველა სახის ნარკოტიკის მოხმარების დეკრიმინალიზაციას მოითხოვენ

„წინა წლებში ჩვენი მოძრაობა მხოლოდ მარიხუანის დეკრიმინალიზაციაზე იყო ფოკუსირებული, თუმცა ვითარება იმდენად შეიცვალა უკვე ქვეყანაში, რომ გადავწყვიტეთ, გაგვეზიარებინა „ნარკოპოლიტიკის ეროვნული პლატფორმის“ მოთხოვნები და წლევანდელ აქციაზე ყველა სახის ნარკოტიკის დეკრიმინალიზაციას მოვითხოვთ“, - ამბობს ლექსო მაჭავარიანი

მოთხოვნათა ჩამონათვალში  შედის ყველა სახის ნარკოტიკის მოხმარებისა და პირადი მოხმარებისთვის მცირე ოდენობით შეძენა/შენახვისთვის სისხლის სამართლებრივი პასუხისმგებლობის გაუქმება, ასევე მცირე ოდენობით შეძენა-შენახვისთვის ადმინისტრაციული პასუხისმგებლობის გაუქმება. ქუჩის იძულებითი ნარკოტესტირებების შეწყვეტა, სამედიცინო და სამეცნიერო-კვლევითი მიზნებისთვის კანაფისა და კანაფისგან წარმოებული პროდუქტების გამოყენების დაშვება.

უკვე მეოთხე წელია, მოქალაქეთა ნაწილი ყოველ 2 ივნისს არსებულ ნარკოპოლიტიკას აპროტესტებს და მარიხუანის დეკრიმინალიზაციას მოითხოვს.