„ქალთა ინიციატივების მხარდამჭერი ჯგუფის (WISG)" კვლევის მიხედვით, „ჰომოსექსუალობა, როგორც არჩევანი“ ერთ-ერთი ყველაზე ნაკლებად გავრცელებული თეორიაა.

გამოკითხულთა 40% მიიჩნევს, რომ ჰომოსექსუალური ორიენტაციის ჩამოყალიბებაზე ბიოლოგიური ფაქტორები ახდენს გავლენას, 38,2% კი სოციალურ ფაქტორებს ასახელებს. რესპონდენტთა 8,1% ფიქრობს, რომ ჰომოსექსუალობა არჩევანია.

გამოკითხულთა ის ნაწილი, რომელიც სოციალური ფაქტორების თეორიას ემხრობა, სხვებზე მეტად იზიარებს ნეგატიურ სტერეოტიპებსა და მითებს, რომელიც ლესბოსელებისგან/გეებისგან მომდინარე „საფრთხეებს“ უკავშირდება. ასევე ნაკლებად ეთანხმება უფლებრივ თანასწორობასთან დაკავშირებულ დებულებებს.

იმ რესპონდენტების 48.3%, ვინც იცნობს ლგბტი ჯგუფის ერთ წარმომადგენელს მაინც, ფიქრობს, რომ ჰომოსექსუალობის ჩამოყალიბებაზე ბიოლოგიური ფაქტორები ახდენენ გავლენას. 26.5% კი ფიქრობს, რომ  ჰომოსექსუალური ორიენტაციის ჩამოყალიბებაზე სოციალური ფაქტორები ახდენს გავლენას. მათ შორის, ვინც არ იცნობს ჯგუფის წარმომადგენლებს ბიოლოგიური (38.3%) და სოციალური (40.5%) ფაქტორები თითქმის თანაბრად პოპულარულია.

რესპონდენტებისთვის ლგბტ საკითხებზე ინფორმაციის ძირითადად წყარო მედიაა, კერძოდ, სატელევიზიო შოუები და ახალი ამბები.

კვლევის „საზოგადოების ცოდნის, ინფორმირებულობისა და დამოკიდებულების კვლევა ლგბტ ჯგუფისა და მათი უფლებრივი თანასწორობის მიმართ“ ფარგლებში 2000 ადამიანი გამოიკითხა. რესპონდენტთა აბსოლუტური უმრავლესობა ქართველი მართლმადიდებელია.