„სპეციალური გამოძიების საგანი უნდა გახდეს, როგორ მოხდა სავარაუდო დამნაშავის შემოსვლა, მათ შორის - საიდან მოხდა შემოსვლა, როგორ მოხდა ამის ხელშეწყობა“, - პრემიერ-მინისტრი გიორგი კვირიკაშვილი ე.წ. კანონიერი ქურდის, დავით გერლიანის დაკავების ფაქტს ეხმაურება. მისივე თქმით, აღნიშნული ფაქტი ძალიან ბევრ კითხვის ნიშანს ბადებს და ამ კითხვებს პასუხი უნდა გაეცეს.
გიორგი კვირიკაშვილმა შინაგან საქმეთა მინისტრს გიორგი მღებრიშვილს მადლობა გადაუხადა ეფექტიანი გამოძიებისთვის.
„ვფიქრობთ, ძალიან კარგია, რომ ძალიან ეფექტიანად 3 დღე-ღამის განმავლობაში, ფაქტობრივად, მთელი სამინისტრო მუშაობდა განუწყვეტელ რეჟიმში. ძალიან ეფექტიანი ღონისძიების შედეგად მოხდა სავარაუდო დამნაშავის დაკავება“, - განაცხადა კვირიკაშვილმა.
22 ივნისს გიორგი მღებრიშვილმა ბრიფინგზე განაცხადა, რომ ე.წ. კანონიერი ქურდი დავით გერლიანი მეტსახელად „სვანი“ დაკავებულია. 19 ივნისს ე.წ. კანონიერი ქურდის საქართველოში შემოსვლის თაობაზე ინფორმაცია „ერთიანი ნაციონალური მოძრაობის“ დეპუტატმა, გივი თარგამაძემ გაავრცელა.
