პრემიერ-მინისტრ გიორგი კვირიკაშვილის განცხადებით, მთავრობა „ტურისტულად მნიშვნელოვანი კულტურული და სხვა ღონისძიებების დაგეგმვის საბჭოს შექმნისა და მისი დებულების დამტკიცების შესახებ“ დადგენილების პროექტს განიხილავს.
პრემიერის განმარტებით, აღნიშნული პროექტი ქვეყნის ფარგლებს გარეთ საქართველოს პრომოციას ემსახურება. პრემიერმა ასევე აღნიშნა, რომ პროექტის დახვეწისა და კერძო სექტორის ჩართულობის მიზნით, შეიქმნება საბჭო, რომელშიც შევლენ, როგორც მთავრობის წევრები, ასევე ბიზნესის წარმომადგენლები.
„მათთან ერთად მოხდება სახელმწიფო ბიუჯეტირების პროცესის პარალელურად მომავალი წლის კალენდრის განსაზღვრა და დასაფინანსებელი ღონისძიებების პრიორიტეტების განსაზღვრა. ძალიან მნიშვნელოვანია, ამ საბჭომ იმუშაოს ეფექტიანი ინსტიტუციური მექანიზმის შექმნის მიმართულებითაც. სავარაუდოდ, შეიქმნება არასამეწარმეო იურიდიული პირი, რომელიც არ უნდა იყოს მომგებიანი ორგანიზაცია, სადაც სახელმწიფო კერძო სექტორის თანამონაწილეობით განახორციელებს ასეთი ტიპის პროექტებს და ვფიქრობთ, ძალიან მნიშვნელოვანია, წინასწარ იცოდნენ, როგორც სასტუმროების ქსელმა, ასევე ტურისტებმა, თუ რა კალენდარი იქნება ჩვენს ქევყანაში ამ მიმართულებით, თავიანთი აქტივობების დასაგეგმავად. მნიშვნელოვანი აქტივობები უნდა დაგეგმოს ასევე ტურიზმის ადმინისტრაციამ, რათა ხელი შეუწყოს ასეთი ტიპის გასართობ, თუ სხვა კულტურულ ღონისძიებებს“, - თქვა გიორგი კვირიკაშვილმა.
