„გიგა ოთხოზორიას მკვლელის დაკავება და სასამართლოზე პატიმრობის მოთხოვნა - ეს ძალიან მნიშვნელოვანი განცხადებაა, თუმცა, ვიტყოდი, რომ სრულყოფილი არაა, იმიტომ, რომ მიმართავენ სასამართლოს, რათა სასამართლომ მიიღოს გადაწყვეტილება“, - განაცხადა შერიგებისა და სამოქალაქო თანასწორობის საქართველოს სახელმწიფო მინისტრმა, პაატა ზაქარეიშვილმა.
მისი განმარტებით, ეს სწორად გადადგმული ნაბიჯია, რადგან, „ჩემს ხელთ არსებული ინფორმაციით, ამ საქმესთან დაკავშირებით აფხაზეთში საკმაოდ რთული ვითარებაა“.
„ფორმულას თუ მიაქცევთ ყურადღებას, საკმაოდ ბუნდოვანია. დადასტურებულია ეჭვმიტანილის ვინაობა, რაც ყველამ ვიცოდით, მაგრამ ვინაიდან აფხაზური მხარე არ ადასტურებდა, არსებობდა საფუძველი, სხვა მიმართულებით წასულიყო გამოძიება. დადასტურდა გვარი, რაშიდ ქანჯი-ოღლი. ასევე ე.წ. სამხედრო პროკურატურა მიიჩნევს, რომ უნდა დაეპატიმრებინათ, პირდაპირ მიმართავს ე.წ. სასამართლოს, რომ უნდა იყოს აყვანილი პატიმრობაში, მაგრამ ახლა სასამართლოზეა გადაწყვეტილება“, - განაცხადა პაატა ზაქარეიშვილმა.
ზაქარეიშვილის თქმით, აქამდე ოკუპირებულ ტერიტორიაზე არ ყოფილა ფაქტი, რომ საქართველოს მოქალაქის მკვლელის მიმართ აღძრულიყო საქმე და არც არანაირი ფორმულირებით არ აღძრულა.
შერიგებისა და სამოქალაქო თანასწორობის საქართველოს სახელმწიფო მინისტრის თქმით, 6 ივლისს გალში ინციდენტების პრევენციისა და მასზე რეაგირების მექანიზმების ფორმატში გასამართ შეხვედრაზე ისეთი ინფორმაციის გაცვლა მოხდება, რომელიც ორივე მხარისთვის მისაღები იქნება.
