„საზოგადოებრივ მაუწყებელში“ ხელფასი 500-მდე დასაქმებულს გაეზრდება, - ამის შესახებ საზოგადოებრივი მაუწყებლის თანამშრომლებსა და ხელმძღვანელებს შორის მედიატორის როლის შემსრულებელმა, ლევან ჟორჟოლიანმა დღეს გამართულ ბრიფინგზე განაცხადა.
მისივე განცხადებით, ერთთვიანი ინტენსიური მუშაობის შედეგად მხარეების ურთიერთობის არასწორი ფორმა აღმოიფხვრა და სწორი კომუნიკაცია დამყარდა.
„ვისაც ხელფასი 500-დან 1000 ლარამდე ჰქონდა, 20%-ით გაეზრდება ანაზღაურება, ხოლო იმ პირებს, რომლებსაც ხელფასი 1000-დან 1500 ლარამდე ჰქონდათ 10%-ით მეტს მიიღებენ. ასევე გათანაბრდა ხელფასი ზუსტად ერთი და იმავე საქმიანობისა და პასუხისმგებლობის მიხედვით”, - განაცხადა ჟორჟოლიანმა.
ახალი და მიმდინარე ამბების ბლოკის დირექტორის გიორგი გვიმრაძის თქმით, ხელფასის მატება ეხება თანამშრომლებს, რომლებიც ერთ წელზე მეტია, უკვე მუშაობენ საზოგადოებრივ მაუწყებელში, ანუ ერთხელ მაინც გაუგრძელდათ კონტრაქტი.