„დემოკრატიული მოძრაობა - ერთიანი საქართველო" ინიციატივით გამოდის, კონსტიტუციის მეშვიდე თავს დაემატოს მუხლი, რომლის მიხედვითაც საქართველო უბლოკო სტატუსს გამოაცხადებს, ანუ უარს იტყვის, ნებისმიერ სამხედრო ბლოკში, მათ შორის NATO-ში გაწევრებაზე.
„საქართველოში არ უნდა იყოს განლაგებული არც ერთი უცხო სახელმწიფოს ან სამხედრო ორგანიზაციის ჯარი. საქართველოში არ უნდა იყოს არც NATO-ს და არც რუსეთის ჯარი. როცა ვლაპარაკობ საქართველოზე, ვგულისხმობ ერთიან საქართველოს - აფხაზეთის და ე.წ. სამხრეთ ოსეთის ჩათვლით. ჩვენ დავიწყებთ ხელმოწერებს ამ ინიციატივების რეალიზებისთვის და დარწმუნებული ვარ, ძალიან ბევრი ადამიანი შემოხაზავს სამ ნომერს და მოგვცემს მანდატს ამ ინიციატივის განხორციელებისთვის" - ამბობს პარტიის ლიდერი ნინო ბურჯანაძე.
მისი განმარტებით, ეს ინიციატივა განპირობებულია დღევანდელ მსოფლიოში მიმდინარე პოლიტიკური პროცესებით და უპირველესად საქართველოს სახელმწიფოებრივი ინტერესებით.
„ჩვენი სამშობლო არ შეიძლება დარჩეს კვლავ ორი სუპერსახელმწიფოს შორის დაპირისპირების პოლიგონად და ექსპერიმენტების ადგილად. არ შეიძლება, ჩვენი ქვეყნის ინტერესები ეწირებოდეს რომელიმე სახელმწიფოს ინტერესებს, რომელიმე ქვეყნის ინტერესებს, სადაც არ უნდა იყოს ეს ქვეყანა განლაგებული" - ამბობს ბურჯანაძე.
