თბილისის საქალაქო სასამართლომ ცოტა ხნის წინ გააუქმა საკრებულოს გადაწყვეტილების ის პუნქტები, რომლებიც საკუთრების ნიშნით დისკრიმინაციულად ზღუდავდა შეზღუდული შესაძლებლობის მქონე პირების მიერ სპეციალური პარკირების ადგილებით სარგებლობას. საკრებულოს დაევალა, რეგულაციები კონვენციის მოთხოვნებთან შესაბამისობაში მოიყვანოს.
თბილისის მუნიციპალიტეტის საკრებულოს 2007 წლის რეგულაციით, რომელიც სასამართლომ ბათილად ცნო, შეზღუდული შესაძლებლობის მქონე პირთა პარკირების ადგილებით სარგებლობის უფლება აქვთ მხოლოდ იმ შშმ პირებს, რომელთა მიმართაც გაიცა სპეციალური საცნობი ნიშანი და მას უნდა იყენებდნენ მხოლოდ იმ ავტოსატრანსპორტო საშუალებისთვის, რომლისთვისაც ის გაიცა. ამასთან, საცნობი ნიშანი შესაძლებელია, გაიცეს ავტოსატრანსპორტო საშუალებათა მხოლოდ განსაზღვრულ კატეგორიებზე (ადაპტირებული M2 ან/დაM3 კატეგორიები, რომლითაც ძირითადად დღის ცენტრების ბენეფიციარები გადაჰყავთ). თბილისის გარდა, ასეთივე რეგულაციები მოქმედებს რუსთავში, ბათუმში, ფოთში, გორში, ზუგდიდში, თელავსა და სხვა.
ამ წესის გამო რამდენიმე მოქალაქე დააჯარიმეს. „პარტნიორობა ადამიანის უფლებებისთვის“ ორგანიზაციის ხელმძღვანელმა ანა აბაშიძემ და კობა ნადირაძემ ეს რეგულაცია სასამართლოში გაასაჩივრეს. მათი თქმით, ის ზღუდავს იმ შეზღუდული შესაძლებლობის მქონე პირთა დამოუკიდებელი ცხოვრებისა და თავისუფალი განვითარების უფლებას, რომელთაც საკუთრებაში ავტოსატრანსპორტო საშუალება არ ჰყავთ.
