„საქმე გვაქვს ჭორიკნობასთან, როდესაც ქალბატონები ჭორაობენ" - ენერგეტიკის მინისტრმა, კახა კალაძემ საკონსტიტუციო სასამართლოს თავმჯდომარისა და საქართველოს პრეზიდენტის მიერ ცალკეულ პირებზე ზეწოლის შესახებ განცხადებები სექსისტური გამონათქვამით შეაფასა [შესწორება. 27.07.2016].
„ეს პოლიტიკური სპეკულაციები მგონია, რადგან ბატონი პაპუაშვილი პროკურატურაში დღემდე არ მისულა." - თქვა კალაძემ.
მისი თქმით, ეს სახელმწიფო ინსტიტუტების დისკრედიტაციის მიზანმიმართული მცდელობაა და მაღალი თანამდებობის პირებს ასეთი განცხადებები არ შეეფერებათ.
გიორგი მარგველაშვილმა დღევანდელ პრესკონფერენციაზე თავისი ოჯახის წევრის მიმართ ზეწოლის ფაქტზე ისაუბრა. მისი თქმით, ეს დაახლოებით ერთი თვის წინ მოხდა. პრეზიდენტის განცხადებით, მისთვის სასაცილო იყო ზეწოლის ამგვარი მცდელობა.
გიორგი მარგველაშვილი დღეს საკონსტიტუციო სასამართლოს თავმჯდომარეს, გიორგი პაპუაშვილს შეხვდა. პრეზიდენტის ინფორმაციით, პაპუაშვილმა მას საკონსტიტუციო სასამართლოს მოსამართლეებზე ზეწოლის კონკრეტული ფაქტები დაუსახელა.