აზერბაიჯანის საკონსტიტუციო სასამართლომ დაამტკიცა რეფერენდუმის აქტი, რომელიც მიზნად ისახავს ქვეყნის კონსტიტუციაში ცვლილებების შეტანას. სხდომა 25 ივლისს გაიმართა.

საკონსტიტუციო სასამართლომ დაადგინა რომ ცვლილებები კონსტიტუციაში, რომელიც პრეზიდენტმა ილჰამ ალიევმა შეიტანა შეესაბამება აზერბაიჯანის კონსტიტუციას.

აზერბაიჯანის საკონსტიტუციო სასამართლოს თავმჯომარემ ფერჰარდ აბდულაევმა განაცხადა, რომ შემოთავაზებული ცვლილებები არ ეწინააღმდეგება აზერბაიჯანის კონსტიტუციას. სხდომაში მონაწილეობა 8 მოსამართლემ მიიღო.

აზერბაიჯანის კონსტიტუციაში ცვლილებები ბოლოს 7 წლის წინ შეიტანეს. „მიმდინარე ცვლილებები ბოლო პერიოდში საჭიროებს კონსტიტუციის გადასინჯვას", - განაცხადა ილჰამ ალიევმა.

ცვლილების ფარგლებში აზერბაიჯანის პრეზიდენტობის ვადა 5-დან 7 წლამდე გაიზრდება.

ილჰამ ალიევს სურს ასევე შემოიღოს პირველი ვიცე-პრეზიდენტის და ვიცე-პრეზიდენტის თანამდებობები.. ცვლილების თანახმად, პირველ ვიცე-პრეზიდენტს და ვიცე-პრეზიდენტს დანიშნავს და თანამდებობიდან გაათავისუფლებს აზერბაიჯანის პრეზიდენტი.

აზერბაიჯანის პრეზიდენტს შეუძლია, გამოაცხადოს რიგგარეშე არჩევნები.

105-ე მუხლით პრეზიდენტის გადადგომის შემთხვევაში რიგგარეშე არჩევნები სამი თვის ვადაში უნდა დაიგეგმოს.

აზერბაიჯანის პრეზიდენტმა ილჰამ ალიევმა 18 ივლისს  ხელი მოაწერა ბრძანებას რეფერენდუმის გამართვის შესახებ, რომელიც მიზნად ისახავდა აზერბაიჯანის კონსტიტუციაში გარკვეული ცვლილებების შეტანას.