„სამართლიანი არჩევნებისა და დემოკრატიის საერთაშორისო საზოგადოება" წინასაარჩევნო პერიოდის მონიტორინგის პირველ შუალედურ ანგარიშს აქვეყნებს, რომელიც 1-18 ივლისს დაკვირვების პერიოდს მოიცავს.
ორგანიზაციის დაკვირვებით, საანგარიშო პერიოდში გამოვლინდა პოლიტიკური ნიშნით ზეწოლა-მუქარის - 2, სამსახურიდან სავარაუდოდ პოლიტიკური ნიშნით გათავისუფლების - 3, ძალადობის - 2, ამომრჩევლის სავარაუდო მოსყიდვის - 2, არაუფლებამოსილი პირის მიერ აგიტაციაში მონაწილეობის - 5 და ადმინისტრაციული რესურსის გამოყენების 2 ფაქტი.
ISFED აღნიშნავს, რომ ზოგიერთ მუნიციპალიტეტში ინიცირებული ან გაზრდილი სოციალური პროექტები საარჩევნო კამპანიის დაწყებას უკავშირდება.
„მართალია, საარჩევნო კოდექსით მსგავსი ცვლილებების განხორციელება მხოლოდ არჩევნების დღემდე 60 დღის განმავლობაში იკრძალება, თუმცა გააქტიურებული სოციალური კამპანიები და ბიუჯეტის თანხების მობილიზება სოციალური პროექტების ირგვლივ აჩენს ეჭვს, რომ ზოგიერთ მუნიციპალიტეტში ინიცირებული ან გაზრდილი სოციალური პროექტები საარჩევნო კამპანიის დაწყებას უკავშირდება" - ვკითხულობთ ანგარიშში.
რაც შეეხება, სავარაუდოდ, პოლიტიკური ნიშნით სამსახურიდან გათავისუფლების ფაქტებს, „სამართლიანმა არჩევნებმა" 3 ასეთი ფაქტი შეისწავლა. ორგანიზაციის ინფორმაციით, სამსახურიდან გათავისუფლების სამივე შემთხვევა მუნიციპალიტეტის თვითმმართველობებში დაფიქსირდა და ყველა გათავისუფლებული სამსახურიდან დათხოვნის მიზეზად პოლიტიკურ კუთვნილებას ან შეხედულებას ასახელებს.
„სამართლიანი არჩევნები“ მონიტორინგის ანგარიშის შედეგად გამოვლენილ პრობლემურ საკითხებთან დაკავშებით ადგილობრივ თვითმმართველობებს, საარჩევნო სუბიექტებსა და უწყებათაშორის კომისიას რეკომენდაციებით მიმართავს.