სახელმწიფო უსაფრთხოების სამსახურის განცხადებით, გორის რაიონის სოფელ კირბალის მიმდებარე ტერიტორიაზე საოკუპაციო ძალების წარმომადგენლებმა ადგილობრივი მცხოვრების უკანონოდ დაკავება სცადეს.
სუს-ის განცხადებით, საოკუპაციო ძალების წარმომადგენლებმა ამ უკანასკნელს ფიზიკური შეურაცხყოფა მიაყენეს.
„ჩვენ მკაცრად ვგმობთ აღნიშნულ ფაქტს, რომელიც წარმოადგენს მორიგ პროვოკაციულ ქმედებას საოკუპაციო ძალების მხრიდან და საფრთხეს უქმნის მშვიდობასა და სტაბილურობას ადგილზე. ინციდენტის თაობაზე ინფორმაცია მიწოდებული იქნა ევროკავშირის სადამკვირვებლო მისიისათვის და ეს საკითხი იქნება ერთ-ერთი მთავარი განსახილველი თემა ინციდენტების პრევენციისა და მათზე რეაგირების მექანიზმის ფორმატის მომდევნო შეხვედრაზე ერგნეთში" - ნათქვამია სახელმწიფო უსაფრთხოების სამსახურის განცხადებაში.