ქორწინების ქალისა და მამაკაცის ერთობად განსაზღვრის საინიციატივო ჯგუფმა ცენტრალურ საარჩევნო კომისიაში დღეს 224 000 ხელმოწერა შეიტანა - ამის შესახებ „ლიბერალს" სანდრო ბრეგაძემ უთხრა.
გსურთ თუ არა, რომ სამოქალაქო ქორწინება განისაზღვროს, როგორც კავშირი მამაკაცსა და ქალს შორის? - ასეა ფორმულირებული სარეფერენდუმო შეკითხვა, რომელიც ცესკოში სანდრო ბრეგაძემ და ზვიად ტომარაძემ შეიტანეს.
როგორც სანდრო ბრეგაძემ „ლიბერალს" უთხრა, მას შემდეგ, რაც კომისია ხელმოწერებს დაახარისხებს, იგი საქართველოს პრეზიდენტს რეფერენდუმის თარიღის დანიშვნის მოთხოვნით მიმართავს.
ცენტრალურ საარჩევნო კომისიაში „ლიბერალს" განუმარტეს, რომ კომისიას ხელმოწერების შესამოწმებლად 1 თვის ვადა აქვს, შემდეგ კი ასევე 1 თვე აქვს გადაწყვეტილების მისაღებად პრეზიდენტსაც.
კონსტიტიციის მოქმედ რედაქციაში ნათქვამია, რომ ქორწინება ემყარება მეუღლეთა უფლებრივ თანასწორობასა და ნებაყოფლობას. სახელმწიფო ხელს უწყობს ოჯახის კეთილდღეობას.
საქართველოს სამოქალაქო კოდექსის თანახმად, ქორწინება არის ოჯახის შექმნის მიზნით ქალისა და მამაკაცის ნებაყოფლობითი კავშირი, რომელიც რეგისტრირებულია საქართველოს იუსტიციის სამინისტროს მმართველობის სფეროში მოქმედი საჯარო სამართლის იურიდიული პირის – სახელმწიფო სერვისების განვითარების სააგენტოს ტერიტორიულ სამსახურში.
