დღეს გაიმართა პარლამენტის ბიუროს სხდომა, რომელიც 15 აგვისტოს ჩაშლილი ბიუროს სხდომის ნაცვლად იყო დანიშნული. სხდომაზე ახალი საკანონმდებლო ინიციატივები და საორგანიზაციო საკითხები განიხილეს.
ბიურომ საპროცედურო საკითხთა კომიტეტს საინიციატივო ჯგუფის (ნ.ბურჯანაძე, მ.აჩბა, ბ.ბაკურაძე, გ.ახვლედიანი, დ.ლორთქიფანიძე, ლ.ჩქარეული, გრ.ბარამიძე, ბ.დანელია, ბ.პეტრიაშვილი, თ.ზურაშვილი) განცხადება გადასცა რეგისტრაციისთვის. კომიტეტის თავმჯდომარე გიორგი კახიანის განცხადებით, აღნიშნულ საკითხთან დაკავშირებით კომიტეტის სხდომა უახლოეს დღეებში გაიმართება.
კომიტეტს მსჯელობისთვის შვიდი დღის ვადა აქვს, ხოლო დამტკიცების შემთხვევაში, საინიციატივო ჯგუფს ხელმოწერების შეგროვებისთვის 4 თვის ვადა მიეცემა.
საინიციატივო ჯგუფს მზად აქვს კონსტიტუციაში ცვლილებების პროექტი, რომლის მიხედვით კონსტიტუციისათვის შემდეგი პუნქტის დამატებას მოითხოვენ: „ტერიტორიული მთლიანობის აღდგენის და დაცვის, თავდაცვისა და უსაფრთხოების მიზნებიდან გამომდინარე, საქართველო არ გაწევრიანდება რომელიმე საერთაშორისო სამხედრო ბლოკში, ან ალიანსში. დაუშვებელია საქართველოს ტერიტორიაზე რომელიმე სამხედრო ბლოკის, ალიანსის, ან ნებისმიერი სხვა სახელმწიფოს სამხედრო შენაერთის განთავსება. უბლოკო სტატუსი მოქმედებს 1991 წლის მდგომარეობით აღიარებულ საქართველოს ტერიტორიულ საზღვრებში".
საქართველოს პარლამენტის თავმჯდომარე, დავით უსუფაშვილი 12 აგვისტოს გამოვიდა ინიციატივით, რომ საქართველოს კონსტიტუციაში, კერძოდ, კონსტიტუციის პრეამბულაში, იქ, სადაც წერია, რა სურს ქართველ ხალხს, დაემატოს ფრაზა:
„დავიმკვიდროთ სრულფასოვანი ადგილი დემოკრატიული სახელმწიფოების უსაფრთხოებისა და თანამშრომლობის ევროატლანტიკურ სისტემაში“.
დავით უსუფაშვილი იმედს გამოთქვამს, რომ მის ინიციატივას სხვა პარლამენტარებიც შეუერთდებიან. ამ იდეის საკანონმდებლო ინიციატივად ქცევას პარლამენტში 75 ხმა სჭირდება.უსუფაშვილის ინიციატივას მხარს უჭერს „ეროვნული ფორუმი“ და „თავისუფალი დემოკრატები“.
დავით უსუფაშვილმა განაცხადა რომ ფრაქციის წევრებს დაურიგდათ სპეციალური ბლანკი და მათ ექნებათ გარკვეული ვადა, პოზიციის გამოსახატავად.