თბილისის მერიასთან "პარტიზანული მებაღეობა"აქციას მართავს. მათი მთავარი მოთხოვნა ეკოლოგიისა და გამწვანების სამსახურის თამაშრომლების გადადგომა და პასუხისგებაში მიცემაა.

იგივე მოთხოვნით ნატა ფერაძემ დღეს მერიასთან შიმშილობა დაიწყო. მისი განცხადებით მოთხოვნების შესრულებამდე ის თბილისის მერიასთან დარჩება და "ამ საქმეს ბოლომდე მიიყვანს".

„სრული პასუხისმგებლობით შემიძლია ვთქვა, რომ  სრულიად ჯანსაღი იყო კედარი და ვერცხლისფერი ნაძვები. ამაზე არც ერთი ჩემი ნაცნობი სპეციალისტი არ მეკამათება. ეკოლოგიისაა და გამწვანების სამსახურის უფროსი, ნინო სულხანიშვილი, რომელსაც ამხელა პასუხისმგებლობა აკისრია და ხელს აწერს ამ ხეების მოჭრას აცხადებს, რომ ვერ იტყვის საღია თუ არა ეს ხეები. სანამ ხელს მოაწერდა მას არ შეუმოწმებია ეს ხეები, ენდო კონტრაქტორ კომპანიას." - ამბობს ნატა ფერაძე. 

დღეს სოციალურ  ქსელში ხეების ჭრის ამსახველი ვიდეო გაავრცელდა. თბილისის მერიის ეკოლოგიისა და გამწვანების სამსახურის უფროსის ინფორმაციით, 45 ხეზე, რომელიც დაავადებული, ამორტიზებული და ზეხმელი იყო, მოჭრის ნებართვა გამწვანების სამსახურმა გასცა. 22 საღ ხეზე კომპანიას უარი ეთქვათ და 5-ზე კი გადარგვის ნებართვა გაიცა.

დღეს გამწვანების სამსახურის უფროსი ყაზბეგის ქუჩაზე იმყოფებოდა. ნინო სულხანიშვილმა ადგილის დათვალიერების შემდეგ “ლიბერალთან” საუბარში საღი ხეების მოჭრა არ დაადასტურა.

„ვიყავი ადგილზე, მაგრამ ზუსტად ვერაფერს ვიტყვით. რამდენად სწორად არის ეს ხეები მოჭრილი, ამას დავადგენთ. როგორც მოსახლეობა და არასამთავრობო ორგანიზაციები ამბობენ, არსებობს ეჭვი, რომ მოჭრილია საღი ხეები. ხშირია, როცა ხე შეიძლება ვიზუალურად იყოს მწვანე, მაგრამ იყოს დაავადებული, ზუსტად ვერ გეტყვით” - განუცხადა „ლიბერალს” ნინო სულხანიშვილმა.

„პარტიზანული მებაღეობის” ინფორმაციით კი, თბილისში ყაზბეგის ქუჩაზე 13 საღი ხეა მოჭრილი.

ყაზბეგის ქუჩაზე კომპანია „ორბი ჯგუფი" 1400-ნომრიან სასტუმროს აშენებს.