ნინო ბურჯანეძე რუსეთში იმყოფებოდა, სადაც რუსეთის მთავრობის წარმომადგენლებს შეხვდა და მოლაპარაკებები გამართა.
ის არ გამორიცხავს არჩევნებამდე რუსეთში განმეორებით ვიზიტს.
„მე ვიყავი მოსკოვში და შევხვდი ბატონ ნარიჟკინს, რომელიც გახლავთ რუსეთის სახელმწიფო სათათბიროს თავმჯდომარე და რომელიც იქნება რუსეთის მომავალი საკანონმდებლო ორგანოს თავმჯდომარე.
ვფიქრობ, ძალიან მნიშვნელოვანი შეხვედრა იყო. ჩვენს შორის შედგა ძალიან საინტერესო და კონსტრუქციული საუბარი. ამ შეხვედრით კიდევ ერთხელ დავრწმუნდი, თუ რაოდენ მნიშვნელოვანია რუსეთის უმაღლეს პირებთან პირდაპირი, უშუალო დიალოგი.
გარწმუნებთ, რომ არჩევნების შემდგომ ყველაფერს გავაკეთებ იმისათვის, რომ უმაღლეს დონეზე დიალოგი გაიმართოს. მე შევხვდები რუსეთის ხელისუფლების მმართველ პირებს და ეს ჩვენ დაგვეხმარება, რუსულ-ქართული ურთიერთობები გადავიყვანოთ ახალ ჭრილში და დავიწყოთ იმ პრობლემების დარეგულირება, რომელიც ჩვენი ქვეყნისათვის არის ძალიან მნიშვნელოვანი“ - განაცხადა ნინო ბურჯანაძემ.
ჟურნალისტის შეკითხვაზე, იგეგმება თუ არა არჩევნებამდე მისი შეხვედრა რუსეთის ხელისუფლების უმაღლესი თანამდებობის პირებთან, ნინო ბურჯანაძემ განაცხადა, რომ ეს დამოკიდებულია იმაზე, თუ როგორ წარიმართება მოვლენები.
„თუ აუცილებელი გახდა არჩევნებამდე კიდევ შეხვედრის გამართვა, არ გამოვრიცხავ რომ ასეთი შეხვედრა შედგეს, თუმცა თვითმიზანი არც ერთი ვიზიტი და არც ერთი შეხვედრა არ გახლავთ“ -განაცხადა ნინო ბურჯანაძემ.
ნინო ბურჯანაძე უფრო ვრცლად მოსკოვში ვიზიტის შესახებ პარტიის სათავო ოფისში 18 აგვისტოს 14:00-ზე დაგეგმილ ბრიფინგზე ისაუბრებს.