მთავრობის კანცელარიასთან პოლიციური ძალადობის წინააღმდეგ 22 წლის დემურ სტურუას თვითმკვლელობის ფაქტთან დაკავშირებით საპროტესტო აქცია გაიმართა. „სახელმწიფომ მოკლა დემურ სტურუა" - ასე იკითხება ბანერი, რომელიც „თეთრი ხმაურის მოძრაობის" მიერ ორგანიზებულ აქციაზე დღეს მოქალაქეებმა გაშალეს. ისინი თბილისიდან სამტრედიაში მიემგზავრებიან, სადაც აქცია 18:00 საათზე უნდა განახლდეს პოლიციის შენობასთან.
22 წლის დემურ სტურუას თვითმკვლელობამდე მიყვანის საქმეზე გამოძიებას დასავლეთ საქართველოს საოლქო პროკურატურის საგამოძიებო ნაწილი აწარმოებს. გამოძიება სისხლის სამართლის კოდექსის 333-ე (უფლებამოსილების გადამეტება) და 115-ე (თვითმკვლელობამდე მიყვანა) მუხლებით მიმდინარეობს.
აქციაზე მოქალაქეებმა შემდეგი მოთხოვნები წამოაყენეს:
1. პასუხისმგებლობაში მიეცეს პოლიციელი გოდერძი თევზაძე და მისი მეწყვილე, რომლის ვინაობასაც პოლიცია ამ დრომდე ასაიდუმლოებს.
2.თანამდებობა დატოვოს სამტრედიის რაიონული პოლიციის უფროსმა.
3.შსს-ს მინისტრმა საზოგადოებრივი ორგანიზეციების თანამონაწილეობით შექმნას მონიტორინგის ჯგუფი, რომელიც თბილისსა და რეგიონებში პოლიციის მხრიდან ძალის გადამეტებისა და შანტაჟის პრაქტიკებს შეისწავლის.
4.დაუყოვნებლივ გადაიდგას ქმედითი ნაბიჯები რეპრესიული ნარკოპოლიტიკის შესაცვლელად.