„პარტიზანი მებაღეებმა“ თბილისის მერიის წინ კარავი გაშალეს.
„პარტიზანული მებაღეობის" მოთხოვნები უცვლელია: გადადგეს თბილისის მერიის ეკოლოგიისა და გამწვანების სამსახურის უფროსი ნინო სულხანიშვილი და მისი მოადგილე ნუგზარ კახნიაური, შემდგომ კი მოხდეს ამ სამსახურის სრული რესტრუქტურიზაცია.
როგორც დღეს გახდა ცნობილი, თბილისის საქალაქო სასამართლომ „პარტიზანი მებაღეების" სარჩელი მერიასთან კარვების განთავსების შესახებ დააკმაყოფილა.
ახალგაზრდა იურისტთა ასოციაციამ 29 აგვისტოს პარტიზანი მებაღეების სახელით თბილისის საქალაქო სასამართლოს მიმართა და მოითხოვა თბილისის მერიის გადაწყვეტილების გაუქმება, რომლითაც აქციის მონაწილეებს არ მისცეს შესაძლებლობა, სკვერის კონკრეტულ ნაწილში კარავი დაედგათ და ამ ფორმით გაეგრძელებინათ პროტესტი.
