კანცელარიის წინ მიმდინარე აქციაზე, სადაც მოქალაქეები დემურ სტურუას სავარაუდო თვითმკვლელობიდან მე-40 დღეს შეიკრიბნენ და ძალადობრივი ნარკოპოლიტიკა გააპროტესტეს,  ბესო ხუციშვილმა თვითმკვლელობა სცადა.

„ფუჭი აქცია მგონია, იმიტომ რომ მაინც არაფერი ეშველება ამ ქვეყანას, ძაღლი როდის იყოს ძაღლის ტყავს ხევდეს, უბრალოდ ცხონებული ბიჭი შეიწირეს, ცემი შვილის ხელა იყო და ვერ გაუძლეს.
ჩემს საქმესთან დაკავშირებით ახალი არაფერია, ამასაც ისე ჩაფარცხავენ, როგორ ამ ცხონებული ბიჭის საქმე ჩაიფარცხა", - ამბობდა ხუციშვილი „ლიბერალთან" საუბარში თვითმკვლელობის მცდელობამდე.

ბესო ხუციშვილი, რომელიც აცხადებდა, რომ პოლიცია ტერორისა და დაშინების გზით აიძულებდა  მისი მეგობრის, ლაშა ბახუტაშვილის დაჭერის თანამონაწილე გამხდარიყო, ვარაუდობს, რომ მის საქმეს სამართლიანად არ გამოიძიებენ.

„ბესო გვესტუმრა სახლში. ტელევიზორში განცხადებები იყოო, რომ პოლიციელი არაფერ შუაში იყო იქო. ბიჭმა თავი მოიკლა და მაგ საქმეს ჩაფარცხავენო. როგორ გგონია, ჩემ საქმეს გამოიძიებენ ობიექტურადო? მეც დამიჭერენ, ლაშასაც და ყველასაცო, ამბობდა. ვუთხარი დღეს აქცია არის მეთქი, აუციებლად წამიყვანე, განცხადება მინდა გავაკეთოო, მითხრა. მე ციხეს ვერ ავიტანო, მითხრა. თავს მოვიკლავო. ძლიერ ფსიქოლოგიურ ზეწოლას ვგრძნობო. ლაშას ეუბნებოდა, ორივეს დაგვიჭერენო" - უთხრა „ლიბერალს" ლაშა ბახუტაშვილის მეუღლემ. 

ინციდენტის შემდეგ ადგილზე სასწრაფო დახმარების მანქანა მივიდა, რომელსაც ხუციშვილი საავადმყოფოში გადაჰყავს.