„რაც უფრო სწრაფად შეჯერდებიან ვიზალიბერალიზაციის შეჩერების გამარტივებულ მექანიზმზე, მით მალე გადაწყდება ვიზალიბერალიზაციის საკითხიც“ - განუცხადა „ლიებრალს“ საგარეო საქმეთა მინისტრის მოადგილემ გიგი გიგიაძემ.
მისი თქმით, საქართველოს ვიზალიბერალიზაციის საკითხი ევროკავშირის საბჭოში მიმდინარე თვის ბოლომდე უნდა განიხილონ.
„საქართველოს ვიზალიბერალიზაციის საკითხზე უნდა შეიკრიბოს ტრილოგია (ევროპარლამენტის მომხსენებელი, ევროკომისიისა და ევროპული საბჭოს წარმომადგენლები). პროგრესი ნამდვილად არის, რადგან ამაზე სამსჯელოდ ტრილოგია უკვე ორჯერ შეიკრიბა. საბოლოო გადაწყვეტილება ჯერ არ მიუღიათ, თუმცა კომპრომისი არსებობს. ახლა გადამწყვეტ ფაზაში ვართ“ - ამბობს მინისტრის მოადგილე.
როგორც ის განმარტავს, COREPER (ევროკავშირის წევრი ქვეყნების მუდმივი წამომადგენლების საბჭო) საქართველოს ვიზალიებრალიზაციის საკითხზე, სავარაუდოდ, მიმდინარე თვის ბოლოს იმსჯელებს.
რაც შეეხება ევროპარლამენტს, როგორც ცნობილია, პლენარული სხდომები ოქტომბერშია ჩანიშნული.
„რადიო თავისუფლების“ ბრიუსელის კორესპონდენტის ცნობით, ევროკავშირის საბჭომ საქართველოს ვიზალიბერალიზაციის საკითხზე 13-14 ოქტომბრის სხდომაზე უნდა იმსჯელოს. რაც შეეხება ევროპარლამენტს, პლენარული სხდომა 3-6 და 24-27 ოქტომბერს არის ჩანიშნული, თუმცა უცნობია, რომელ სხდომაზე უყრიან კენჭს ამ საკითხს.
იმისათვის, რომ საქართველომ უვიზო მიმოსვლა მიიღოს, საჭიროა როგორც ევროპარლამენტის, ასევე ევროკავშირის საბჭოს დადებითი შეფასება.