„საერთაშორისო გამჭირვალობა საქართველომ“ ქართული მედიის შესახებ დღეს ანგარიში წარადგინა. ანგარიშში 2012 წლის საპარლამენტო არჩევნებიდან დღემდე ქართული მედიაში არსებული ვითარებაა აღწერილი. ანგარიშის მიხედვით, საანგარიშო პერიოდში აღინიშნა ჟურნალისტების შანტაჟისა და მათზე ზეწოლის ცალკეული ფაქტებიც, რომელთა ეფექტიანი გამოძიება ხშირ შემთხვევაში არ ხდებოდა. ანგარიშში აღნიშნულია, რომ ჟურნალისტების შრომითი უფლებების დაცვის მხრივ, ქვეყანა კვლავ მნიშვნელოვანი გამოწვევების წინაშეა. ასევე ხაზგასმულია მნიშვნელოვანი ფინანსური გამოწვევები, რომლის წინაშეც რეგიონული მედია დგას.
ანგარიშის ავტორთა თქმით, საქართველოში მედიაგარემოს შეფასებისთვის საკვანძო საკითხად იქცა ტელეკომპანია „რუსთავი 2-ის“ მფლობელობის შესახებ დავა, რამაც არაერთი კითხვა გააჩინა პროცესის პოლიტიკურ კონტექსტთან დაკავშირებით.
„საანგარიშო პერიოდში ანტიდასავლური მედიასაშუალებების გააქტიურება შეიმჩნეოდა. ზოგ შემთხვევაში აღნიშნული მედიასაშუალებები გარკვეულ დაფინანსებას საბიუჯეტო ორგანიზაციებისგან იღებდნენ - ნათქვამია ანგრაიშში.
ამავე ანგარიშში აღნიშნულია, რომ 2012 წლიდან დღემდე ქართული მედიასივრცე უფრო პლურალისტური გახდა, რასაც სხვადასხვა საერთაშორისო რეიტინგში ცვლილებებიც მიუთითებს. ასევე ნათქვამია, რომ 2015 წელს მაუწყებელთა სარეკლამო შემოსავალმა მნიშვნელოვნად იკლო. თუმცა 2012 წლამდე პერიოდისგან განსხვავებით, სახელმწიფო არ ერევა სარეკლამო ბაზარში და ის ნაკლებად მონოპოლიზებულია. ორგანიზაცია დადებითად აფასებს 2015 წლის ზაფხულში ციფრულ მაუწყებლობაზე გადასვლის ფაქტს.
ანგარიშში ცალკე ქვეთავი აქვს დათმობილი 4 წლის განმავლობაში მაღალრეიტინგული გადაცემების დახურვის ფაქტებს.
„4 წლის განმავლობაში დაიხურა რამდენიმე მაღალრეიტინგული გადაცემა. ამის მიზეზი, გადაცემის წამყვანების ინფორმაციით, მთავრობას და მედიამფლობელებს შორის გარკვეული გარიგება ან მფლობელის პოლიტიკა დასახელდა.“ - ნათქვამია ანგარიშში.