„საერთაშორისო გამჭვირვალობა - საქართველოს“ აღმასრულებელმა დირექტორმა, ეკა გიგაურმა დღეს ივანიშვილის მიერ მის მიმართ გამოთქმულ ბრალდებებს უპასუხა.
„საერთაშორისო გამჭვირვალობა - საქართველო“ მზად არის კონსტრუქციული დებატებისა და დისკუსიისთვის, იქნება ეს სასამართლო რეფორმა, თუ მედიაგარემო, თუ ანტიკორუფციული სისტემები და კიდევ ბევრი სხვა თემა, რაზეც ჩვენი ორგანიზაცია მუშაობს. მაგრამ ძალიან არ მინდა, ჩემი მისამართით ნათქვამ არაეთიკურ გამონათქვამებს პასუხი გავცე და ამაზე დიდი დრო დავხარჯო. პირველ რიგში, ამას ყველაფერს არასერიოზულად მივიჩნევ და მეორე მხრივ, ჩვენს ორგანიზაციაში წინა საარჩევნო ციებ-ცხელებაა. მინდა, მალე დადგეს საქართველოში დრო, როცა ოპონენტები პიროვნულ შეურაცხყოფას შეეშვებიან და „დაპირისპირება" მხოლოდ საქმიანი იქნება. ასევე, ქვეყნის სამსახური და სამხედრო ან პოლიციის წოდება საქილიკო და სამარცხვინო არ იქნება“.- განაცხადა ეკა გიგაურმა.
ბიძინა ივანიშვილს კახეთში რეგიონულ მედიასთან შეხვედრისას ჟურნალისტებმა 26 მაისის საქმესთან დაკავშირებულ ახალ კადრებსა და მესამე სექტორის შეფასებებზე ჰკითხეს. ექსპრემიერის თქმით, მესამე სექტორი დასვრილი და დაბინძურებულია.
„რომელი მესამე სექტორი?! ის მესამე სექტორიც ხომ დასვრილი და დაბინძურებულია. სამოქალაქო საზოგადოება მათ, უკაცრავად და, გარყვნეს, ისეთ ხალხი შედის და ისეთ ნიშას იკავებენ, რომ ისეთი აგრესიულები „ნაციონალური მოძრაობის“ წევრებიც არ არიან, ძალიან ხშირად. ალბათ, „პაგონებიანმა“ გიგაურმა თქვა. იქ ფულზე რომ იყო საუბარი, გიგაურმაც მიიღო „პაგონები“ მაგ დროს - მე არ ვიცი ეს ჭორები, მაგრამ უწერენ მაგასაც. მე მესამე სექტორს კი არ ვაკრიტიკებ, მესამე სექტორში თავშეფარებულ ხალხს ვაკრიტიკებ. ამ სექტორს ნუ აბინძურებენ, გამოვიდნენ და დაირქვან სახელი, რომ „ნაციონალური მოძრაობის“ წევრები არიან“, - განაცხადა ბიძინა ივანიშვილმა.