პატრიარქის პრესმდივან მიქაელ ბოტკოველის თქმით, რომის პაპის ვიზიტის წინააღმდეგ მართლმადიდებელ მშობელთა კავშირის მიერ 21 სექტემბერს ვატიკანის საელჩოსთან გამართულ „ლოცვით დგომის აქციის" საპატრიარქო ალბათ განცხადებით გამოეხმაურება.
„ლიბერალთან" საუბარში ბოტკოველმა აღნიშნა, რომ იგი აქციას ვერ შეაფასებს.
„არ გაუკეთებია [საპატრიარქოს] განცხადება? არ ვიცი, ვერ გეტყვით. ალბათ, განცხადება იქნება. მე ვერ გეტყვით, შეფასებას მე ვერ გავაკეთებ" - თქვა ბოტკოველმა.
ვატიკანის საელჩოსთან მართლმადიდებელ მშობელთა კავშირმა მრევლთან ერთად რომის პაპის ვიზიტის წინააღმდეგ „ლოცვითი დგომის აქცია“ გამართა. სასულიერო პირები და მოქალაქეები ვატიკანის საელჩოსთან შეიკრიბნენ და პროტესტი ლოცვით გამოხატეს.
განცხადებაში, რომელიც მათ გაავრცელეს, პაპი ერეტიკოსად და„მამათმავლობის მფარველად" არის მოხსენიებული.
„პაპის პიროვნული დამოკიდებულება მართმადიდებლებისდმი მისი სიტყვებიდანაც ჩანს, როდესაც იგი მართმადიდებლებს ოთხზე მავალ კატის კნუტებს ადარებს, რომელთაც ჯერ სიარული არ უსწავლიათ. იგი ქრისტიანებს მოუწოდებს, ბოდიში მოუხადონ სექსუალურ უმცირესობებს. აცხადებს, რომ აპირებს უცხოპლანეტელთა მონათვლას. ეს უცნაურიცაა და საშიშიც,"- ამბობენ „მართმადიდებელ მშობელთა კავშირში".