ადვოკატ გელა ნიკოლეიშვილის განცხადებით, რომელიც ორგანიზაცია „ქართული ძალის" წევრის, ნიკოლოზ ბურნაძის ინტერესებს იცავს, დაკავებულებს ხულიგნობასთან ერთად რასობრივი დისკრიმინაციის ბრალდებაც აქვთ წაყენებული, რაც 4-დან 7 წლამდე პატიმრობას ითვალისწინებს.
„მე მხოლოდ ერთ-ერთ ბრალდებულებს ვიცავ, საქმის მასალებიდან გამომდინარე, არანაირი მტკიცებულება, რომ მან ჩაიდინა კონკრეტული დანაშაული, რომელიც გადის გამოხატვის თავისუფლებისა და სიტყვის თავისუფლების ფარგლებიდან, რეალურად არ არსებობს. დღეს მხოლოდ აღკვეთის ღონისძიების საკითხი იხილება. აღკვეთის საფუძველი, ჩემი ღრმა რწმენით, ნიკოლოზ ბურნაძის იმართ არ არსებობს. საქმეში არც ერთი ვიდეო ჩანაწერი არ დევს, თუმცა მიმართეს მაღაზიების მეპატრონეებს და ამოიღებენ. ერთ-ერთი ბრალდებული შუშის ჩატეხის ფაქტს აღიარებს. საუბარია ბანერზე. მივიჩნევ, რომ შეუსაბამო კვალიფიკაციაა მიცემული და სავსებით შესაძლებელი იყო ადმინისტრაციული წესით ყოფილიყო განხილული. ვფიქრობ, საბოლოო ჯამში მივაღწევთ იმას, რომ ჩემი დაცვის ქვეშ მყოფის მიმართ მოსამართლემ გამამართლებელი გადაწყვეტილება გამოიტანოს." - განაცხადა გელა ნიკოლეიშვილმა.
თბილისის საქალაქო სასამართლოში ნაციონალისტური მოძრაობა „ქართული ძალის" წევრების პროცესი მიმდინარეობს. იმ მიზეზით, რომ 11-მათგანიდან 7 არასრულწლოვანია, მოსამართლემ სხდომა დახურა.
28 სექტემბერს ნაციონალისტური ორგანიზაცია „ქართული ძალის" მსვლელობა აღმაშენებლის გამზირზე, შეხლა-შემოხლით და მსვლელობის მონაწილეთა დაკავებით დასრულდა.
