თბილისის საქალაქო სასამართლომ ტრანსგენდერი ქალის განზრახ მკვლელობის მცდელობაში ბრალდებულის წინასწარ პატიმრობაზე პროკურატურის შუამდგომლობა დააკმაყოფილა.

პროკურატურამ წინასასამართლო სხდომისთვის მაქსიმალური ვადა, დაპატიმრებიდან 60 დღე მოითხოვა. ბრალდებულმა გიორგი მურჯიკნელმა აღკვეთის ღონისძოების სახით 1000 ლარის ოდენობის გირაო ითხოვა. პროკურატურა ამას არ დაეთანხმა.

მოსამართლემ აღნიშნა, რომ "ბრალდებულის ქცევა საზოგადობისთვის მომატებულ საფრთხეს წარმოადგენს და საჭიროა მისი იზოლირება".

8 დეკემბერს, 11 საათზე წინასასამართლო სხდომა გაიმართება.

გუშინ პროკურატურამ 2016 წლის 14 ოქტომბერს ტრანსგენდერ ქალზე თავდასხმაში ბრალდებული პირის მიმართ აღკვეთი ღონისძიების სახით პატიმრობის გამოყენების თაობაზე შუამდგომლობით თბილისის საქალაქო სასამართლოს მიმართა.

14 ოქტომბერს, ორთაჭალის ტერიტორიაზე ეჭვმიტანილი გ.მ. თავს დაესხა ტრანსგენდერ ქალს. მსხვერპლს მრავლობითი დაზიანებები აქვს მიყენებული თავისა და ყელის არეში. მისი ჯანმრთელობის მდგომარეობა ამ დრომდე მძიმეა და საავადმყოფოში მართვით სუნთქვაზე იმყოფება.

პარალელურად, თბილისის საქალაქო სასამართლოსთან მოქალაქეები მძიმედ ნაცემი ტრანსგენდერი ქალის მხარდასაჭერად შეიკრიბნენ.